Alaskami uuliamik qalluisoqassanersoq oqallisaavoq

Alaskami Chukchip imartaani uuliamik qalluisoqassanersoq innuttaasunut tusarniaassutigineqaleruttorpoq.
juulip 04-at 2011 06:17

Imartami tassani uuliamik qalluinissaq pillugu Alaskami illoqarfimmi Fairbanksimi sapaatip-akunnerani kingullermi tusarniaasitsisoqarpoq. Imartaq taanna Alaskap Chukotkallu akunneranni avannaaniippoq, tamaanilu inuppiaat nunaqarfiat Barrow inissisimalluni.

Chukchip imartaani qillerinissamut akuersissutinik  10 milliardit koruunit sinnerlugit nalilinnik tunisaqartoqareerpoq. Sulili qillerisoqarsimannginneranut pissutaavoq inuit tamaaniittut, avatangiisinillu illersuiniaqatigiit, tamaani qillerisoqannginnissaa anguniarlugu eqqartuussivilersuussisimammata.

Chukchip imartaani qillerisoqarsinnaanersoq paasiniarlugu amerikami imartanut aamma nukissiuuteqarnermut ministeriaqarfik maanna tusarniaasitsivoq.

Fairbanksimi tusarniaasoqarnerani, inuit 100-t sinneqartut ataatsimiigiarput, taakkulu isumaat assigiinngeqaat.

Uuliamik qalluinissat Alaskap siunissaanut pitsaasumik kinguneqassasut tapersersuisut isumaqarput. Tamaani suliffissaqarniarnermut Alaskallu aningaasaqarniarneranut iluaqutaassasut isumaqaramik.

Illuatungaanili uuliamik maqisoortoqassagaluarpat uuliasiorfissuit sillimaniarnermik pitsaasumik pilersaaruteqanngitsut atortunillu saliissutaasinnaasunik peqanngitsut, akerliusut isumaqarput.

Tusarniaanerit inerneri USA-mi ministeriaqarfiup nalunaarusiarissavaa, oktobarillu ulluisa pingajuani aalajangiisoqassalluni.