Alaskami timmissat misissuiffigineqarput

Alaskami ilisimatuut biologillu timmissat aallartartut nappaateqarsoralugit maanna misissuileruttorput.

Saarfaarsuit sigguttuut Amerikap avannaani takussaasartut biologinit soqutigineqarnerupput tasamanimi timmissat nappaataannik H5N1-imik naammattuisoqarsimavoq.

Timmissat nujuartat ukiaru Amerikamut kujavartinnagit nappaammik taassuminnga nappaateqarnissaat paasissallugu ilisimatuut neriupput, Associated Press taama allappoq.

Timmissat nappaataat Amerikamut ukioq manna timmissat aallartartunit anngunneqassanersoq qulakkeerlugu oqaatigineqarsinnaanngilaq. Anngutissagaluarpat sapinngisaq tamaat atorlugu timmissat tuniniagassat tunillanneqannginnissaat inuussutissarsiutinik nakkutilliisoqarfimmit sulissutigineqassaaq.

Sulianiarnerlu maannagaaq aallartillugu saarfaarsuit timmissat nappaataannik tunillatsissimanersut misissuiffigineqarpoq.

Timmissat aallartartut 70.000-t 100.000-illu akornanni anaannik katersilluni misissuisoqarpoq.

Saarfaarsuit Canadami, Alaskami Siberiamilu erniortarput. Timmissat kangianiit upernassakkut ukiukkullu Alaska aqqusaarlugu angalasarnerat ilisimaneqarpoq. Taamaattumik Siberiami erniorfiit kangiani H5N1-mik nassaarfioqqaartumut qanimmata biologit ernumapput.

Saarfaarsuit affai Alaskami Canadamilu erniortarput sinnerilu Siberiami erniortarlutik. Siberiami erniortartut ikittuinnaat Kangiani, Australiami, New Zealandimilu ukiisarput. Taakku timmissat nappaataannik naapparsimalinngikkaluarlutik tunillaassuisinnaassasut ilimagineqarpoq.