Alaskami qimussimik sukkanerpaat apuupput
Qaqqat, qeriuaannartup masarsoqarfii, apussuaq sermillu aqqutigalugit 1.820 kilometerinik isorartussusilimmi qimusserneq. Qimussimik sukkaniuttarnerit nunarsuatsinni isorartunersaat qularnanngitsumillu ilungersunarnersaat, tamakkuninnga unammilligassaqarpoq.
Qimussimik sukkaniunneq Iditarodimik taaguutilik Alaskami illoqarfiup Anchoragep eqqaani Willowimit marsip sisamaanni aallartimmat qimussit 66-it peqataapput. Aqqutaanili sukkaniuteqataasut 13-it uniinnarsimammata, sinneruttut 53-it Inuppiat illoqarfiannut Nomemut ullumi apuunnissaat naatsorsuutigineqarpoq.
Sukkanerpaat maanna apuutereersimalerput, sukkanersaallutik Dallas Seavey aamma sukkaniuteqataasoq arnaq Aliy Zirkle, tamarmik Alaskameersut. Taakku 16-inik qimmeqarlutik aallaramik siulleq qulingiluaannarnik aappaalu quliinnarnik qimuttoqarlutik apuupput.
Ulluni qulingiluani nalunaaquttallu akunnerini arlalinni ilungersoreerlutik, sukkaniuteqataasut taakku marluk Nomemut nalunaaquttap akunneranik ataasiinnarmik nikingallutik ullumi apuupput.
Dallas Seavey ajugaavoq, ullut qulingiluat nalunaaquttallu akunneri sisamat atorsimallugit. Aliy Zirkle nalunaaquttap akunneranik ataasiinnarmik kingulliulluni apuuppoq.
Qimussimik sukkaniunneq Iditarod internetikkut tv-kkullu malinnaaffigilluarneqartarpoq. Alaskamilu ukiup pisimasuini pingaarnerpaatut isigineqartarluni. Sukkaniuttut Anchoragemit aallarmata nalliuttorsiutigineqarput, Nomemullu apuunneranni nalliuttorsiutigineqarnerat suli annerussalluni. Sukkaniuteqataasuni maannamut arfinillit apuutereersimalerput 47-llu suli utaqqineqarlutik.
