Alaskami qaqqaq suli innermik anitsivoq
Innermik anitsisartoq Augustine innermik anitseqqissimammat, Alaskap illoqarfiisa ilaanni Anchorage-imi (Ankvits-imi) timmisartukkut angallanneq unitsinneqarpoq. Illoqarfik taanna innermik anitsivimmiit 300 kilometerinik ungasitsigisumiippoq.
Timmisartuussisarfiup Alaska Airlines-ip Anchorage-mut ingerlasussat taakanngaanniillu aallartussat innermik anitsisartup anitsinera peqqutaalluni arsakoqarpallaarmat timmisartuussinissaraluit unitsippai. Alaskamiit oqaaseqartartup Amanda Tobin-ip nalunaarutigaa, timmisartuussinissat 36-t kinguartinneqartariaqarsimasut.
Arctic Winter Games 2006 Alaskami Kenai-mi ingerlanneqassaaq, nunatsinniillu timersortartut kattuffianiit Jens Brinch isumaqarpoq, Alaskami innermik anitsineq Arctic Winter Games-eqarnissaanut akornutaanavianngitsoq.
- Pisariaqavissappat unammersuaarnissat unitsinneqarsinnaapput, ulluimi allanngortinneqarsinnaanngillat, kisianni tamanna ilimananngilaq. Innermilli anitsineq taamaarusaaginnassappat ajornartorsiutinik pilersoqarnavianngilaq, Jens Brinch oqarpoq.
