Alaskami illoqarfeeraq nuunneqassanersoq taasissutigileraat
Alaskap sineriaani illoqarfeeraq innuttaasuilu silap pissusiata allanngoriartornera pissutigalugu tamakkerlugit nuunneqassappat?
Illoqarfeeqqami Shishmarefimi innuttaasut tamanna taasissutigissavaat, aviisi The Guardian taama allaaserisaqarpoq.
Illoqarfeeraq Beringsstrædip avannaatungaani qeqertamiippoq 650-illu missaanik innuttaasoqarluni. Sermilli aakkiartulerneratigut imaq qaffakkaluttualerpoq illoqarfeeqqallu imaanut morsussinnaanera aarleqqutigineqarluni.
Illoqarfeeqqap nuunneqarnissaa akueralugu taasisoqassappat, USA-mi illoqarfiit silap pissusiata allanngoriartornera pissutigalugu nuunneqartut siullersarissavaat. Nuunneqassappallu sumut nuunneqassanersoq suli aalajangiunneqarsimanngilaq.
Taasititsineq marlunngorpat pissaaq inerneralu pingasunngornikkut nalunaarutigineqassalluni. Aviisi The Guardian naapertorlugu, najukkami oqartussaasut taama nalunaarput.
Illoqarfeeqqap innuttaasuisalu nuunneqarnerat 180 millionit dollarsinik akeqassangatinneqarpoq - tassalu 1 milliardit koruunit missaannik.
Illoqarfeeqqami innuttaasut ukiuni kingullerni qeqertami inissakilliulersimapput, Shishmarefimeersoq Esau Sinnok, USA-p nunami namminermi pissutsinut ministereqarfianut taama allaaserisaqarpoq.
- Pinngortitap neriuineratigut sineriatta 750-915 meteria ukiuni kingullerni 35-ni annaavarput, siorna allaaserineqartumi taama allassimavoq.
- Paasiuminarsalaarlugu: Uanga 1997-imi inunngorpunga, taamanimiillu Shishmarefip nunataata ilaa meterit 30-t missaat annaavarput. Pinngortitap neriuinera pissutigalugu illut 13-it - ilaatigut aanama illua - qeqertap illuatungaanut ukiuni kingullerni 15-ini nuuttariaqarsimavagut, Sinnok taama allappoq.
Illut nunami qeriuaannartumi toqqaveqarnerat aamma ajornartorsiutaavoq. Illoqarfiup sanaartorfigineqarnerani nuna qeriuaannartoq sianigalugu sanaartortoqarpoq. Nunali qeriuaannartoq maanna aakkiartulerpoq, illoqarfiullu toqqavigisaa taamaammat aamma aakkiartorluni.
- Qeqertaq ukiuni qulikkuutaani tullerni marlunni pinngortitap neriuineratigut tunguttussaassaaq, Esau Sinnok taama allappoq.
Shishmaref illoqarfeeqqat silap pissusiata allanngoriartornerata kingunerisaanik ajornartorsiortinneqartut kisiartarinngilaat. Kisitsisit amerikamiut naalakkersuisuisa saqqummiussaat naapertorlugit, illoqarfeeqqat 13-it "iliuuseqarfigineqartariaqartumik aarlerinartorsiorput", aviisi The Guardian taama allappoq.
Sinerissap nakkaattoorsinnaanera qarsutsinersuaqarsinnaaneralu aarleqqutigineqarpoq.
/ritzau/
