Alaskami arnamik aamma siuttortaarput

USA-mi qinersineq ataatsimut isigalugu Demokratit ajugaagaluartut Republikanerit Alaskami guvernøriutitsinertik tigummiinnassavaat. Nutaarsiassaqartitsivik Associated Press taama nalunaarpoq.

Ajugaasoq tassaavoq illumi ningiu, 42-nik ukiulik, Sarah Palin. Taanna naalakkersuinikkut suliaqarnermik misilittagaqartoorsuunngilaq, taamaallaat Alaska-mi nunaannarmi illoqarfinnguami borgmesteriusimagami. Maannali tassa Alaska tamakkerlugu naalakkersuinikkut siuttunngorpoq.

Republikanerit qinigassanngortitassaattut ukiumi matumani siusinnerusukkut inissippoq, maannakkut guvernøriusoq ajugaaffigigamiuk. Tassami Alaskamiut taassuma naalakkersuisui qatsulluinnarsimavaat, pinerlunnermik ingerlatsinerat, kammalaatinillu sullissinerat, naammagilerlugit.

Naalakkersuinikkut misilittagartooq alla ippassaq qinersinermi ajugaaffigaa. Tassa siornagut guvernøriusimasoq Demokratit qinigassanngortikkaluarmassuk.

Sarah Palin-ip qineqqusaarnermini neriorsuutigai ammanerusumik ileqqorissaarnerusumillu naalakkersuinikkut ingerlatsinissaq.