Alaskami anorersuaq
Alaskap sineriaani illoqarfiit ilaanni Kivalina-mi sisamanngormat sialussuarluni anoraasuarujussuaqattaarnerata kinguneranik mallit qaarnerisigut sapusiarsuit uppikaalermata, illoqarfiup inuisa arlalippassuit angerlarsimaffitsik qimattariaqarsimagaat, aviisi Anchorage Daily News allaaserinnippoq.
Illoqarfik Kivalina 330-nik inoqarpoq, taakkunanngalu inuit 50-t kisimik illoqarfimminniiginnartut allaaserineqarpoq – taakkulu amerlanersaasa imaq nunamut uliguttoq unikaallatsinniarsaralugu puut sioqqanik imallit qaleriiaartiteraluarpaat. Illoqarfiullu inuisa sinneri piniariarfinnut illoqarfimmullu qaninnerusumiittumut qimarrassimanerarneqarput.
Illoqarfiup Kivalinap ukiut pingasut ingerlanerani sineriak 30 meteriniit takinerusoq annaavaa. Sapusiarsuaq 600 meterisut takissusilik 3 millioner dollarinillu nalilik siorna sanallugu naammassineqaraluarpoq. –Sapusiarsuarli uingasumik sananagu nappaarissutut sananeqarsimammat illoqarfiup inuisa sapusiarsuup atasinaanissaa ilimaginngilaat.
