Alaska arsarneerutissangatinneqarpoq

Nunarsuup kaaviffiini saviup kajungerisaata isui nikikkiartorput, tamatumalugooq malitsigisinnaavaa Alaskami ukiut 50-it qaangiuppata arsarneerussinnaanera.

San Franciscomi ilisimatuut ataatsimeersuarneranni ilisimatuut assigiinngitsut taama aarlerisaaripput. Nunarsuup kaaviffiini saviup kajungerisai illuariartorneri iluatigalugit arsarnerit Sibiriap tungaanut illuariartulissasut paasinarsisimammat.

Kajungerisaq kujammut Qalasersuup tungaanut ukiut 400-t ingerlaneranni illuariartorsimavoq, ukiulli tallimat matuma siorna paasineqarpoq, kajungerisap illuariartornera allamut saqissimasoq. Tassagooq sukkaqaluni Avannaarsuanut illuariartulersimavoq.

-Arsarnerit ukiut 50-t qaangiuppata qanoq sumilu inissisimassanersut uanga nammineq siulittuutigisinnaanngilara, avannamulli illuariartuinnassappata nunarsuup arsarneqarfia aamma soorunami malinnaassaaq, ilisimatooq Denverimeersoq, Jeffrey Love, USGS-imi suliniaqatigiiffimmi pisortaasoq, nassuiaavoq.

- Oqartoqarsinnaanngilaq silaannaap kissatsikkiartornera pissutaasoq. Pissutaasormi tassavoq, nunarsuarmi nikkeli saviminissarlu imerpalasoq kajungerisarujussuartut inissisimammata, Alaskami silaannarsualiarneq pillugu ilisimatusarfissuarmi, University of Alaska Fairbanksimi, direktøri, Neal Brown nassuiaavoq.