Alaska aningaasanut inatsiseqannginneranit eqqugaarujussuarpoq

Alaskali piareersarluarsimavoq. Naalagaaffiummi suliassat pingaarnerit ingerlatiinnarnissaat qulakkeerniarlugu "ajunaarnersuarmut pilersaarusiorsimavoq".

Taamaasillutillu pisariaqarnerpaatut isigineqartut ingerlaannartussanngorput. Suliffimminnit angerlartitaanngitsut tassaapput naalagaaffimmut innuttaasunullu tunngatillugu sillimaniarnikkut suliaqartut, allakkeriveqarneq, akileraartarnermut allaffeqarfiit, kiisalu aamma peqqinnissakkut kiffartuussiviit, utoqqalinersiutinik akiliisarneq aamma pisortanit ikiorsiissutinut allaffeqarfiit. Sakkutooqarnerup annersaa aamma ingerlaannarpoq.

Angerlartitaasulli suliartoqqusaajunnaartullu kikkuuppat? Taakku ilagaat silasiorfimmi sulisut Alaskami timmisartuussisartunut kiffartuussivik pingaaruteqarluinnartoq, mekanikerit naalagaaffiup biiliinik iluarsaassisartut timmisartunillu aquttut Alaskami nunanik allanngutsaaliukkanik nakkutilliisut. Nunat allanngutsaaliukkat aamma matoqqatinneqarput.

Timmisartunik nakkutilliisut suliinnarput, mittarfinnili isumannaallisaanikkut suliallit amerlasuut angerlartitaasimallutik. Mittarfiit ammatiinnarneqarput.

Kongressimullu ilaasortap Don Youngip Alaska Dispatchimut oqarneratut:

-Suliffeqarfinnik matooraalissagaluarutta sivisuupilussuarmik matoqqasussanngussapput.