al-Qaedakkut pisortaat toqutaanerarpaat
Qunutitsillutik Irakimi saassussisaqattaartartut al-Qaedakkut pisortaat, Abu Ayyup al-Mashri, amerikamiut sakkutuuinit toqunneqarsimasoq, naalakkersuisunit tusarfik irakimiu ilisimatitsivoq.
Irakimili amerikamiut sakkutuuisa tamanna ilumuunnginnerarpaat. Illu Irakip kippasissuani illoqarfiup Hadithap qanittuaniittoq amerikamiut sakkutuuisa silaannarmiit nunamiillu ullaaq saassuppaat, al-Qaedakkut pisortaata illumi tassaniinnissaa ilimagalugu.
- Isumaqaraluarpugut Abu Ayyup al-Mashri saassussinitsinni toqutaasunut ilaasoq. Inuup ilisarnaataanut takussutissamik, DNA-mik, suli misissuivugut, isumaqanngilagulli al-Mashri toqutaasoq, amerikamiut sakkutuuisa oqaaseqartartuat, Barry Johnson, nutaarsiassaqartitsivimmut Reutersimut oqarpoq.
Mashri, egitsinimiuusoq, Irakimi al-Qaedakkunni juunimi pisortanngorpoq, qunutitsillutik saassussisaqattaartartut taamanikkut pisortaat, jordanimiu, Abu Musab al-Zargawi toqutaammat.
