al-Qaeda-kkut Benazir Bhutto toqussimagunaraat

Tusatsiagarli tamanna iluamik uppernarsineqavinngilaq, Pakistanilli naalagaaffimmi pissutsinut ministereqarfianit ullumi oqaatigineqarpoq, al-Qaeda-kkut toqutassaminnik allattorsimaffiutaanni Benazir Bhutto toqutassanut allassimasunut ilaatinneqarsimasoq. Taamaattumik taassuma toqutaaneranut al-Qaedakkut pisuusimasinnaanerat ilimagilluinnarneqarpoq.

Pakistanimiut ullaaq manna aliasussimaqisut tusagassiorfinnit oqaluttuarineqarpoq, atuarfiit tamarmik aningaaseriviit suliffeqarfiillu tamarmik matoqqatinneqarput. Akerliusullu kamaqisut ippassaq ullumilu aliasunnertik ersersinniarlugu aqqusinerni assersuiutigalutik biilinik inissianillu ikuallatitseqattaarput. Oqaluttuarineqarporlu akerliusut præsidentertik Pervez Musharraf kamaateqigaat. Ilaatigullu allaat politeeq ataaseq toqunneqarsimavoq.

Pakistanimi politikkikkut illuatungiliuttoq siusinnerusukkullu ministeriunerusimasoq Nawaz Sharif ippassaq nalunaarpoq Præsidentiminnik akerliunertik takutinniarlugu qineqqusaarnissaminnik tunuarlutik.

Benazir Bhutto ullumi ilisaareerpoq.