Al-Qaeda-kkut Amerikamiunik toqutsinerarput

Pinerliiniaqatigiit al-Qaeda-kkut videomik tamanut saqqummiussipput, video taanna amerikamiut sakkutuuinik marlunnik toqungasunik imaqarpoq. Sakkutuut naalliutsitaallutik toqutaasimanerat ersareqaaq.

Qaammat kingullerli timaat nassaarineqareeraluarput, aatsaalli massakkut al-Qaedamiit nassuerutigineqarpoq sakkutuut toqunerannut namminneq akisussaasuullutik. Niviarsiaqqap irakimiup pinngitsaalineqarsimaneranut akiniaallutik amerikamiut sakkutuui taamaalillugit toqussimavaat.

Ajortuliat taakku marluk imminnut attuumassuteqarnersut suli uppernarsineqanngilaq.

Al-Qaedap oqarnera naapertorlugu sakkutuut videomi takutinneqartut sakkutuut allat marsimi ajortuliarisimasaat pillugu toqunneqarput.

Marsip qaammataani amerikamiut sakkutuui sisamat illoqarfimmi Yusafiyahmi aalakoorlutik niviarsiaraq 15-inik ukiulik pinngitsaaleriarlugu toqussimavaat, ilaqutaalu toqoriarlugit illuat ikuallariaraluarsimallugu. Sakkutuut ajortuliortut taakku USA-mi paarnaarussaaqqapput, toqumullu pillagaasinnaallutik.

Al-Qaeda-miut ajortuliornertik taakku kanngunartuliornerannut akiniaanerunerarpaat.

Amerikamiut videomi takutinneqartut Yusafiyahmi sakkutuujusimapput, soorlu amerikamioqataat pinngitsaaliillutik toqutsisimasut aamma Yusafiyahmi sakkutuujusimasut.

Al-Qaeda-p nalunaarutigaa niviarsiaqqap pinngitsaalineqarneranut akiniutitut sakkutuut toqussimagitsik.

- Tusaqqaaratsigu pinngitsaaliillunilu toqutsisoqarsimasoq kamannerput allanut takutissimanngilarput, aalajangerpugulli niviarsiaqqap eqqaaneqarnera ataqqinartuutinniarlugu akiniaaniarluta. Guutip ikiorpaatigut sakkutuunik tigusarinninnitsinnik, Al-Qaeda nalunaaruteqarpoq.

Amerikamiut akipput videop taassuma takutsikkaa al-Qaedameersut qangatut suli inuuneqarnerat.