Al Qaeda Boston Maratonimi qaartartumeerisuunavianngilaq

Al Qaeda Boston Maratonimi qaartartumeerisuunavianngilaq. Amerikamiut atorfilittaasa ilaat, kinaaneranik taaneqanngitsoq, CNN-imut taama naliliivoq.

Atorfilik taanna USA-mi naalagaaffiup isumannaatsuunissaanut ministerimit Janet Napolitano-mit taperserneqarpoq.

Taamatut ilimatsaassaqarnerup saniatigut kikkut aamma qassit qaartartumeerisuunersut suli ilisimaneqanngitsoq, FBI-mit ippassaq nalunaarutigineqarpoq. Qaartartumeerinernut inuit arlallit toqutaanerannik kinguneqartunut akisussaasunik suli nalunaartoqanngilaq, paasiniaaqqissaartulli pasinartorpassuarnik pasitsaassaqarput.

- Pasisavut qassiusinnaappulluunniit, FBI-p misissueqqissaartuini qullersaq, Rick DesLauriers, Bostonimi tusagassiortunik katersortitsinermi oqarpoq. Taassuma ilanngullugu oqaatigaa, ataasinngormat qaartartumeerinerup kingorna  mianersortumik peqqissaarullugulu paasiniaaqqissaartoqartoq.

Atorfillit ilaat paasiniaaqqissaarnermut atatillugu assinik qaartartumeeriffimmeersunik nassaarsimasoq ippassaq unnukkut kingusissukkut oqaatigineqarpoq. Tamatumuuna qaartartut qaartinneqartut, inuit pingasut toqutaanerannik 176-illu ikiligaanerannik kinguneqartut sumit sananeqaateqarnerat ilaatigut paasinarsivoq.

Batteriiaqqat, kikissat najungasut qarasaasiallu ilamerna tassani takuneqarsinnaapput. Taakku saniatigut ippassaq aamma oqaatigineqarpoq, aalap naqitserulunneragut qalaassivik, kaavittup kaaviffianik saviminernik perraqusigaq qaartartuliamut ilaasimagunartut.