Al Gore præsidentimut qinigassanngortissanerpa
Filmiliani ilitsersuisartunut filminilu inuttanut inuusalianik Oscarinik ukiumoortumik agguaassinersuaq ippassaq pimmat, Kalaallit Nunaat aamma annertunngikkaluamik pissarsivoq.
USA-mi præsidentimut sinniisussaasimasoq, Al Gore, inuusaliannguamik akissarsisunut ilaavoq, filmimut ”En ubekvem sandhed”-imut filmilioqataasimasutut. Filmi taanna silaannaap kissatsikkiartorneranut tunngasuuvoq, silaannaallu kissatsikkiartornerata Kalaallit Nunaanni sunniutai filmimi maluginiarneqarsinnaasorujussuupput, Amerikamilu politikerit akornanni ulluinnarni tamanna oqaluuserineqangaatsiarpoq.
Al Gorep filmiliaa maluginiarneqartorujussuuvoq, eqqarsaatersuutigineqangaatsiarporlu præsidentimut qinersisoqalerpat Al Gore immaqa qinigassanngortikkumaartoq, silaannaap nunarsuaq tamakkerlugu allanngoriartornerata oqallisigineqarnera qineqqusaarutigalugu.
Gorep aalajangiusimavaa præsidentip illorsuanut, Det Hvide Husimut, 2008-mi iserternissani pilersaarutiginnnginnamiuk, George W. Bushimut ukiut arfineq-pingasut matuma siorna ajorsaqqatulaarnermi kingorna.
Nutaarsiassaqartitsiviup The Economistip Al Gore tassaanerarpaa, demokraatit sinnerlugit qinigassanngortissinnaalluartoq, Irakimimigooq sorsunnermut qangali akerliusimavoq, avatangiisit pillugit sukataartartuuvoq, aamma Buship naalakkersueriaasia akerleriuarsimallugu.
Aviisimi Washington Postimi ippassaq allassimavoq, "Al Gore, Rock Star," rappillammassup Queen Latifap Gore taasimallugu; præsidentimut sinniisussaasartuni qasusuinnersaat.".
