Al Gore nunatsinniittoq

Al Gorep filmiliornissani pillugu Ilulissaniittoq oqaatigineqarpoq.
Assi © : wikipedia
Allattoq Mads Lynge
juulip 13-at 2016 09:09

Al Gorep filmiliarisimasaanut piviusulersaarutimut "En ubekvem sandhed"-imut, kalaallisut "Ilumoortoq iluaaginartoq"-mut nutserneqarsinnaasumut, nangitsinertut taaneqarsinnaasumik filmiliortoqartoq nalunaarutigineqarpoq.

Filmi "En ubekvem sandhed" ukiut qulit matuma siornatigut saqqummersinneqarpoq, nersualaarneqaqalunilu. Silap pissusiata allanngoriartornerata malitsigisai Al Gorep filmimi tassani eqqartorpai.

Al Gore, Naalagaaffiillu Peqatigiit Nobelip eqqissinermut nersornaasiuttagaanik ukiup tulliani nersornaaserneqarput, silap pissusiata allanngoriartornerata sunniutaasa tamanut saqqummiunneqarniarnerat nersorniarneqarluni.

Filmiliap piviusulersaarutip "En ubekvem sandhed"-ip saqqummersinneqarneranit qaammatialunnguit matuma siornatigut ukiunik qulinngortorsiorneqarmat avatangiisinik nunani tamalaani illersuiniaqatigiinnit nersualaarneqarpoq, Al Gorellu filmimut tassunga nangitsisumik filmiliornissaa kajumissaarutigineqarluni.

Filmiliortoqarnialersorlu Sermitsiaq.AG-p nittartagaani allaaserineqarpoq, nunattalu avannaani ilaatigut assiliisoqassasoq allaaserineqarluni.

- Piviusulersaarummik 2006-imi filmiliannut nangitsisumik filmiliorniarpunga, Al Gore, aviisimut The Sunimut ukioq manna apriilimi ilaatigut oqarpoq.

- Pissutsit taamanikkorniilli pitsaanerulernikuunngillat, soqutiginnittoqalersimavorli eqqummaarittoqalersimallunilu, inuppassuillu ernumalersimallutik, Al Gore, The Sunimut oqarpoq.