Al Gore aamma Josef Motzfeldt oqalugiassapput

Amerikami præsidentimut tullersortaasimasoq Nobel-illu eqqissinermut nersornaasiuttagaanik nersornaaserneqarsimasoq Al Gore, silap pissusaa pillugu isumasioqatigiinnermi oqalugiassalluni ulluni makkunani Savalimmiuniippoq.
Allattoq Jaaku Lyberth
apriilip 07-at 2008 06:38

Isumasioqatigiinneq taaguuteqartinneqarpoq, TransAtlantic Conference, tassa atlantikoq akimorlugu nunat assigiinngitsut isumasioqatigiinnerat.

Al Gorep oqalugiarnermini nunarsuarmi tamarmi silap allanngoriartonerani immap avatangiisillu sunnerneqarnerat immikkut oqalugiaatigissavai.

Thorshavnimi Nunat Avannarliit Illuanni isumasioqatigiineq ingerlanneqassaaq inuillu 350-it missaanniitttut peqataassapput.

Nunatsinnit oqalugiassaaq nunanut allanut naalakkersuisuusimasoq Josef Motzfeldt, taassuma silap pissusaata allanngoriartornera kalaallit isaannit isigalugu oqalugiaatigissavaa.

Isumasioqatigiinneq aqagu ingerlateqqillugu assigiinngitsunik saqqummiussisoqassaaq, tassani peqataasut oqallinnissamut tunngavissanik nunanut avannarlernut soqutiginaateqarsinnaasunik saqqummiussivigineqassallutik, aviisi Sermitsiaq nittartakkamini taama allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq