Akuunerulernissamik inatsit inatsisartuni saqqummiunneqarpoq
Inatsisartut ataatsimiinneranni oqaatsitigut akuunerulernissamik inatsiseqalissasugut Siumup gruppia ullumi siunnersuuteqarpoq. Partiip naalakkersuisut siunnersuuteqaqqullugit Inatsisartut aalajangiiffigisassaattut siunnersuut saqqummiuppaat.
-Maani nunami inuiaqatigiit assigiinngitsunik oqaasillit massakkut najugaqarput. Kalaallisut oqaatsigut pingaarnerpaapput. Qallunaat tuluillu oqaasii aamma atorneqarput, ilaatigullu oqaatsit allarluinnaat atorneqarlutik. Taamaattumik Siumuminngaanniit isumaqarpugut akulerutsitsinissaq massakkut inissisimanitsinni pingaaruteqartorujussuusoq. Imaanngilaq inuiaqatigiit allat oqaasiinik ajorinnikkatta, kisianni aamma uagut kalaaleqatitta oqaatsinik allanik ilinniarsinnaanerannut periarfissat pitsanngorsarneqarnissaat pingaartikkatsigu, Siumup oqaaseqartartua Jens Lars Fleischer oqarpoq. Taassuma tikkuagai pingasuupput.
Siullermik qallunaat tuluillu oqaasiinik ilinniarnissamik pisariaqartitsisut tikkuarneqarput. Aappaattut kalaallit oqaasiinik ilinniassallutik pisariaqartitsisut, kiisalu nunatsinni inooriaatsitsinnik, kulturitsinnik oqaluttuarisaanitsinnillu ilinniarusuttut.
Tamakku ilinniartitsineruneq aqqutigalugu piviusunngortinniarneqarput, ilaatigut internetti Nuummilu oqaatsinik pikkorissarfiliortoqarneq aqqutigalugit.
Inatsisartuni oqallittoqarnerani tikisitat aamma eqqartorneqarput. Tikisitat oqaatsitsinnik ilinniarnissaat pinngitsaaliissutaassava imaluunniit neqeroorutaassava? Siumup oqaaseqartartua aperaarput tikisitat oqaatsigut pinngitsooratik ilinniartassaneraat:
-Piumasaqaateqarnermik imaqanngitsoornavianngilaq. Pinngitsaaliinerpalaartumik nipeqartumik apeqqusiisoqarnera soorunami eqqumiiginarsinnaavoq. Kisianni piumasaqarneq imaanngilaq pinngitsaaliinerusoq, kisianni piumasaqaateqarneq soorunami avaqqunneqarsinnaanavianngilaq.
-Tikisitaq periarfissinneqassaaq periarfissarlu taanna tigusinnaavaa aamma atorsinnaavaa, Jens Lars Fleischer oqarpoq.
Pilersaarutigineqarpoq aappaagu ukiaanerani siunnersuut inatsisissatut siunnersuutigineqarluni saqqummiunneqarumaartoq.
Inatsisartuni oqaatsit pillugit allat aamma oqallisigineqarput. Siunnersuutigineqartoq alla tassaavoq nunarput nunani avannarlerni oqaatsit atorneqartut tamarmik nunani avannarlerni tamani atorneqarsinnaanerannut isumaqatigiissummut ilanngutissasoq.
Akuerineqassaguni isumaqarpoq kinaluunniit nunani avannarlerni kommunimut oqaatsini atorlugit saaffiginnissinnaasoq. Soorlu kalaaleq Finlandimi oqaatsini atorlugit pisortanut saaffiginnissinnaalissalluni.
