Akutaanerup juullimi tunissutaa: Ateraasat atornikut meeqqanut pisariaqartitsisunut

Ateraasat timersuutit taarserneqallattaajuarput uffa allat amigaateqartut. Siornatigut akissarsiutigalugu assammik arsartartup Akutaaneq Kreutzmannip tamanna iliuuseqarfiginiarpaa
Akutaaneq Kreutzmann
Akutaaneq Kreutzmann ateraasanik atornikunik katersivoq Tasiilamut Qaanaamullu nassiussassanik Assi © : Toyoda Gosei Blue Falcon
Allattoq Noah Mølgaard
decembarip 01-at 2020 12:54

Akutaaneq Kreutzmann illoqarfinni assigiinngitsuni timersortitseqattaarpoq timersornermik pingaartitsisut allat suleqatigalugit. Akutaanerli aamma eqqarsalersitsisumik takusaqarpoq.

- Ajoraluartumik meerarpassuit Tasiilami Qaanaamilu timersuutinik ateraasaqanngillat. Timersortitsinitsinni alersaannaq imaluunniit isigaannaallutik peqataapput, Akutaaneq Kreutzmann KNR-mut oqaluttuarpoq.

Kisitsisinngorlugu taasinnaanngilaa isorliunerusuni meeqqat qassit ateraasanik amigaateqarnersut.

- Pilersuisuni ateraasat akii aamma misissuataarakkit takusinnaavara assersuutigalugu inoqutigiinni ataatsini meeqqat pingasut timersorusussappata tamaasa ateraasassaqartinnissaat akissaaleqissunneqarsinnaasoq, Akutaaneq Kreutzmann oqaluttuarpoq.

Akutaaneq Kreutzmann:

30-nik ukiulik:

Maniitsumi inunngortoq

Siornatigut akissarsiutigalugu assammik arsartartoq ukunani:  GOG, Ribe aamma Toyoda Gosei Blue Falcon Japanimi

Aasaq angajunilu Angutimmarik Kreutzmann Maniitsumut angerlarput

Qeqqata Kommuniani timersornermut ambassadøri
Nunanut allanut unammisartoq

Qisuarialertorput

Taanna Facebookimi ataasinngorneq novemberip 30-at kajumissaarivoq ateraasanik atornikunik katersuiniarnissamut kingorna Tasiilamut Qaanaamullu nassiunneqartussanik. Maannalu ulloq unnuarlu ataaseq qaangiutiinnartoq katersuiniarneq ingerlallualereerpoq.

- Inuit arlallit saaffiginnereerput ateraasanik atornikunik nassiussiffiginiarlunga. Sapaatip akunnera tulleq aamma Nuummukartussaavunga tamannalu iluatsillugu suliffeqarfiit assigiinngitsut saaffigissamaarpakka Tasiilamut Qaanaamullu nassiussinissap akissaqartinnissaa anguniarlugu, Akutaaneq Kreutzmann oqarpoq.

- Maanna aamma periarfissaalereerpoq ateraasanik atornikunik timersoqatigiit kattuffiata allaffianut tunniussinissamut. Taamatuttaaq Sisimiuni timersornermut siunnersorti attavigineqarsinnaavoq, Akutaaneq Kreutzmann oqarpoq.

Taassuma aamma qularutiginngilaa ateraasanik suli atoqqissinnaasunik peqartut amerlassasut taakkulu ateraasat pisariaqartitsisuni nuannaarutaasinnaasut.

- Tamanna eqqarsaatigisarnikuunngikkaluarpara. Akissarsiutigalugu unammisartuugallarama ukiumut ateraasat unammissutit arlallit tunissutisiarisarpakka sulilu atoqqissinnaasut igiinnartarlugit, Akutaaneq Kreutzmann oqarpoq.

Taassuma aamma neriuutigaa tunissutit tigulluarneqarumaartut.

- Neriuppunga meeqqat tunineqartut angajoqqaavisa manna paatsuussanngikkaat. Uani anguniarneqartoq tassaavoq sapinngisamik meeqqat amerlasut timersornissamut periarfissinneqarnissaat, Akutaaneq Kreutzmann oqarpoq.

Suli oqaatigisinnaanngikkallarpaa qaqugu siulliit nassiunneqarsinnaassanersut.