- Aamma nalunngilarput corona ilaatigut erloqinalaartaraluartoq kisianni uninnganikuunermik taamaammat Nuummi katersuutissaagut, Akutaaneq Kreutzmann oqarpoq.Assi: Toyoda Gosei Blue Falcon

Akutaaneq Kreutzmann VM-imut anngunniunnissamut: - Tamatta 100 procentimik unammiumaarpugut

Assammik arsarlutik angutit nunanut allanut unammisartut VM-imut anngunniunnissamut piareersarlutik Nuummi februarip aallartisimalernerani katerissapput.

Angutit assammik arsarlutik nunanut allanut sungiusaasortaavat Johan Zanottip unammisartut VM-imut anngunniunnissamut piareersarlugit Februaarip sisamaaniit aqqarnat ilanngullugu, kateritsilerpai. Sungiusaanermilu ikiortaata unammisartuujutigisup Akutaaneq Kreutzmannip sumi anngunniuttoqassanersoq suli aalajangiunneqarsimanngitsoq KNR-imut oqarpoq.

- Massakkut Cuba aaqqissuisinnaajunnaartutut nalunaarnikuugami, taavalu nalunaarfigineqarpugut aamma Dominikanske Republikki immaqaluunniit Mexico-mi ingerlanneqassasoq. Tassunga tungaanut sungiusarnerit tassa aallartereernikuupput aamma Maribo-mi Danmark-imiikkatta oktobarimi massakkullu ingerlariaqqittussaalluta arsartut 23-t uku Nuummiittut aammalu allaminngaanneersut katersortussaavagut, Akutaaneq Kreutzmann oqarpoq.

Anngunissamut periarfissaqarluartut

VM-imut anngunniunnissaq marsip apriililluunniit qeqqani ingerlanneqassaaq.

- Aamma nalunngilarput corona ilaatigut erloqinalaartaraluartoq kisianni uninnganikuunermik taamaammat Nuummi katersuutissaagut.

Kalaallit Nunaat VM-imut anngunnissamut periarfissaqarluarsinnaasoq Akutaaneq Kreutzmannilu isumaqarpoq.

- Nalunngilarpummi uanga USA-mut ajorsarnikuunngilanga aamma Cubakkut ajugaaffiginikuuagut. Taamaammat nalunngilara ataqqinnissusermik peqartut uagutsinnut aamma uagut killumut taama ataqqisorujussuuarput arsartartut taamaattut. Takusinnaavagut ilai Champions Leaguemi håndboldimi ilaasut, aamma USA-mi arsartuusut europamut pisalernikuupput, taamaammat uagut pingasuulluta taakkua 1-nngorniunnissaq unammissutigissagunarparput.

"Sungiusarluarnissarput pingaarutilerujussuuvoq"

VM-imulli anngunnissaq ilimagereerneqarsinnaanngilaq, unammiuaarnissamummi piffissaq qanillimmat sungiusarluarnissaq pingaarnerpaavoq.

- Massakkut sungiusarluarnissarput pingaarutilerujussuuvoq massakkut sivikitsuinnanngormat unammisaqattaarnissarput. Taamaammat ilimagisaqarpallaanngilanga nalugatsigu aamma qanoq isikkoqarnersut holdit allat. Kisianni ilimagisinnaavarput tamatta 100 procentimik unammiumaartugut aammalu ajugaanissarput taanna tunaartaraarput, Akutaaneq Kreutzmann oqarpoq.

Amerika avannarlermi pissartanngorniunneq aamma VM-imut anngunniunnerusoq marsip apriililluunniit qiteqqunnerani ingerlanneqassaaq, maannamulli sumi nunami aaqqissuunneqassanersoq suli aalajangiunneqanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl