Akunnittarfiutillip aningaasarsiorneq unikaallalersoraa
Suliffeqarfiit akileraarutaanut maleruagassat ajorseriassagaluarpata imaassinnaalluarpoq Namminersorlutik Oqartussanut Kommuninullu ukioq siulleq aappaanilu iluaqutaassasoq. Ukiulli marlussuit qaangiuppata aningaasaliinerit ikileriassapput siumullu aallarteqqikkuminaallissallutik, taama Helge Tang oqallissaarutimini ilaatigut tunngavilersuivoq.
Suliffeqarfinnummi akileraarutit pillugit maleruagassat atuuttut malissagaanni suliffeqarfiit akileraarutinut akiliisarnissaat kinguartinneqarsinnaavoq, tassalu erniaqanngitsunik pisortaniit aningaasanik atorniarsinnaatitaammata amigartoorutit pinngortartut matussuserumallugit pisortat suliffeqarfiutaani akileraarnerulertarneq politikkikkut sulinermi aallaaviunara Helge Tang-ip tikkuartuuppaa.
- Akileraarutinimmi akiliinissamut kinguartitsisinnaanerup kingunerisaanik suliffeqarfiliullaat suliffeqarfiisa patajaallisarneqarnissaanut aningaasat atorsinnaasarpaat, tassalu suliffeqarfiit ataavartunngortinneqarnissaanut aqqutissiuisarlutik. Tassa suliffeqarfinni akissarsianit akileraarutit kommunit, nunattalu karsianut malunnaataasumik isertitaqaalersarlutik, Helge Tang oqarpoq.
Aamma nunatsinni akileraarutinik akiliinissamut kinguartitsisinnaanerup politikerinit Danmarkimisut iinnarneragaanera ilumuunnginnerarpaa. Uagummi suliffeqarfitta akileraarutigisartagaat Europami qaffasinnerpaanera politikerertatta puigortuaannarpaat, tassami maani 32 procentiuvoq, massa Danmarkimi 25 procentiinnaassaqqaartoq. Aamma nunat allat suliffeqarfiisa akileraarusersorneqartarneri apparsarneqaleruttorput, Sverigemimi suliffeqarfiit akileraarutigisartagaat ukiortaamiit 22 procentiinnarmut apparniarneqarpoq, Helge Tang oqarpoq.