Takornariartitsinermut ikiorsiineq nutaaq ilaatigut takornarialerisut angalatitsinermi akikilliisinnaanngornerannik kinguneqarpoq. Toqqorsivimmit assi.Assi: KNR / Anton Gundersen Lihn

Akunnittarfiup pisortaa ikiorsiinermut nutaamut: Iluaqutaassaaq, naammannanili

Akikilliinerup takornarialerisunut ikiorsiinermut nutaamut ilanngunneqarnera ajunngilluinnarpoq, Naalakkersuisulli nunatsinni timmisartumik angallanneq aamma akikillisariaqarpaat. Akunnittarfiup pisortaa taama oqarpoq. Sulisitsisut tapersiipput.

Iluaqutaallunilu tapertaalluassaaq. Nuummi akunnittarfiup Hotel Hans Egedep takornarialerisullu Greenland Escapep takornarialerisunut ikorsiineq nutaaq qujaruppaat.

Ikiorsiineq nutaaq akunnittarfiit takornarialerisullu unnuisussanut angallassassaminnullu COVID-19-eqarnerani akikilliisinnaanngornerannik kinguneqarpoq.

Assersuutigalugu akunnittarfiit unnuisitsinermut 500 koruunit tungaannik tapiissutisisinnaanngorput. Nuummi Hotel Hans Egedep pisortaanerata, Jørgen S. Bay-Kastrupip, tamanna nuannaarutigaa.

- Naalakkersuisut suliniuteqarnikkut, tamatumani ikiorsiissutiginasuaateqarnikkut akunnittarfiutilinnullu unnuisoqarnermi 500 koruuninik maanna tapersiinikkut nunatsinni takornarialerisunut sorpassuartigut suliniuteqarnerat ataqqeqaarput, Jørgen S. Bay-Kastrup oqarpoq nangillunilu:

- Taamaaliornerat nunatsinneersunik takornarialerinermik patajaallisaanissatsinnut tapertaalluarsinnaasutut isigaarput.

AAMMA ATUARUK Inuussutissarsiornermut ikiorsiissutit nutaat takornarialerisunut tapersiissasoq

Takornarialerisup Greenland Escapep aamma Nuummiittup aammalu unnuiffissaatillip angallassisartullu akikillliisinnaalernerminnut aaqqiisoqarnera aamma nuannaarutigaa.

- Unnuisoqartarnitsinnut iluaqutaassangatippara. Unnuinissamut inniminniisartutta 60 procentiisa nunanit allaneersuusartut eqqoriarpara.

 - Neriuppunga takornarialerisunut nutaamik ikiorsiineq unnuisarfitsinnik ulapitsitsilissasoq, tamatumuunali nunatsinneersunit nunatsinni takornariarusuttunit, Greenland Escapemik piginnittoq aqutsisorlu Jesper Øraker oqarpoq.  

Takornarialerisunut ikiorsiissutit nutaat akunnittarfimmi unnuinermut tapersiinermut saniatigut takornarialerisut takornarianik angallassinermut 300 koruuninik tapersiinermut aamma atorneqarsinnaapput. Namminersorlutik Oqartussat neqeroorutaat tamanna ullormut angallassinermut ataatsimut atuuppoq.    

Angallanneq akikillineqarlik

Taamatulli akikilliineq naammanngilaq. Nunatsinniittut nunatsinni feeriarnissaannut politikkikkut anguniakkat allamik suliniuteqarnikkut ikorfartorneqarnissaat, akunnittarfiup pisortaanerata Jørgen S. Bay-Kastrupip neriuutigisimagaluarpaa. 

- Timmisartumik angallannerup taperserneqarnissaata aamma isumaliutigineqarnissaa neriuutigisimagaluarpara. Nunatsinnimi takornariarluni timmisartumik illoqarfimmiit illoqarfimmut angallannikkut feeriarneq nunatsinni najugalinnut akisoorujussuuvoq.

- Taamaammat nunatsinni timmisartorlutik umiarsuarlutilluunniit angallattunut tapersiisoqarnissaanik aaqqiisoqarnissaa najoqqutassiortoqarnissaalu neriuutigisimagaluarpara, akunnittarfiup pisortaa oqarpoq.

Naallu akunnittarfik Namminersorlutik Oqartussanit taperserneqartussaagaluartoq aasamut neriuuteqarpallaanngilaq.

- Soorunami neriuppunga iluaqutaalaarumaartoq, timmisartornermulli bilitsit akikillineqanngippata tamanna iluaqutaangaarnavianngissoraara.

AAMMA ATUARUK Turisme i Tasiilaq og omegn er hårdt coronaramt

Sulisitsisut timmisartornermut bilitsit akikillineqarnissaannut apeqqut arajutsisimanngilaat. Inuussutissarsiornermut naalakkersuisumut Jens Frederik Nielsenimut (D) saqqummiussimagini, Sulisitsisut pisortaata nassuiarpaa.

- Tamatumunnga atatillugu eqqartugassatut soqutiginartitavut saqqummiuppavut. Akunnittarfinnimi unnuinermut angallassinermullu neqeroorutit atorluarneqassappata nunatsinni timmisartumik angallattoqarnissaa pisariaqarpoq.

- Timmisartorlunimi angallanneq nunatta qeqqani ilaqutarinnut kujataaliarusuttunut illuanulluunniit angalarusuttunut akisuvoq, Brian Buus Pedersen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat