Akunnittarfinni unnuisartut amerleriarput
Nunatsinnut tikeraat akunnittarfinni unnuisarneri amerlatsikkiartortut Naatsorsueqqissaartarfiup
nalunaarutigaa.
Allattoq Elisa Isaksen
Siorna 83.000-it unnuisimapput, ukiumut siulianut sanilliullugu 6.000-inik amerleriaateqarlutik, tassa akunnittarfinni unnuisartut siorna 8 procentimik amerleriarput.
Unnuisut amerleriarnerinut nunatsinneersut ataatsimeersuarnernut peqataasartut amerlisimanerannik peqquteqartinneqarpoq.
Qeqertarsuup Tunuani illoqarfiit amerleriarfiunerpaapput. Taakkunanimi unnuisut 15 procentimik amerleriarnerisigut unnuisartut siorna 24.000-inngorsimammata.
Kujataanili tikeraat unnuisartullu ikileriarsimapput. Tamannalu Qorlortorsuarmi erngup nukissiorfiliornermi sulisut Islandimeersut sulisorineqarunnaarnerannik nassuiarneqarpoq.