Akunnerup naanerani eqqissisimaqaat

Tallimanngornermi arfininngornermilu ippassaani ippassarlu sinerissami inuit eqqissisimasimaqaat politeeqarfiit attaveqarfigisavut taama akisarput.

Nuummi ulluni taakkunani julefrokostertoqaraluaq eqqissiviilliortoqarsimanngilaq, Nuummilu pisimasoq ilungersunarnernut ilaasinnaasoq ippassaq oqaatigillatsiagarput tassa imarpikkoorutip assartuutip Naja Arcticap Nuup talittarfianut qanillivereerluni anorimit tigusaalluni tallimanngorneq unnukkut tippussaanera sarpimmi ulunneri innarlerlugit. Tamatuma nalaani Nuup politiivi umiarsualiviliarsimapput ajutoorfik asseriartorlugu.

Sisimiuni illuni ataasiakkaani perulluliornerit eqqaassanngikkaanni unnuit taakku marluk inuit eqqissisimasimapput.

Aamma Paamiuni illunit ataasiakkaani perulluliornerit tallimanngornermi pisut aqaguani, tassa ippassaq, politiit ataasiaannarlutilluunniit sianerfigineqarsimanngillat, Paamiunilu politiit decembarip imaalinera tikivillugu eqqissisimatitaasimaqaat. Qaqortumi ippassaani ippassarlu politiit suliassaqarpiarsimanngillattaaq.

Tasiilami politiit ippassaq ataasiaannavillutik aggersarneqarsimapput, Illoqqortoormiuni ullut kingulllit marluk inunnik eqqissiviilliortoqarsimanngilaq.

Qaanaamilu sapaatip akunnera naanersiorsimavaat eqqissimallutik.

Ilulissat radioaviisimut ajoraluartumik oqaaseqarumanngillat.