VIDEO Akunnaamiut: Nunaqarfimmiuusugut nammineq nuunnissarput aalajangissavarput
Sumiiffinni ikinnerusuni najugaqarnissarput, nunaqarfiit sulilluarfiusut attanneqassasut nunaqarfiillu allat nalinginnaasumik matuneqassasut, Folketingimi ilaasortaq Aaja Chemnitz Larsen Folketingimi ammaanersiorluni oqallinnermi taama ilaatigut oqaaseqarpoq.
Gerth Nielsen Akunnaami inunngorpoq, takorloorsinnaanngilaali illoqarfimmut nunaqarfimmulluuniit allamut nuusalluni. Nunaqarfiillu matoorarneqarnissaanut oqallinnermut peqataatinneqarusuppoq.
AAMMA ATUARUK IA-p Aaja Chemnitz Larsen akerlilerpaa: Soorunami nunaqarfinnik matoorisoqassanngilaq
- Uanga paasisinnaavakka. Soorunami nunaqarfippassuaqarpoq ilaatigut tunisassiornikkut, allatigullu inuutissarsiornikkut, takussutissaqarpianngitsunik. Nunaqarfimmiuusugut tamakku eqqartorneqassappata oqallittunut minitaanata pinngitsoorata peqataasariaqarpugut.
Grethe Olsen nunaqarfini eqqissisimanartutut misigisimasarpaa, ilaquttanilu nammineq Akunnaani pilersillugit. Matooraarnissamut oqallinnermi oqaaseqartinneqarusuppoq:
-Kinaluunnit inuk isummersorsinnaavoq qanorluunniit, taamatut aamma pineqarsinnaavugut. Kisianni aamma nunaqarfimmiuusugut uagut soorunalimi arlaannik pineqarutta oqaaseqartitaasussaavugut.
Akunnaami innuttaasut 2010-imili ikilisimapput. Nunatta Naatsorsueqqissaartarfiata kisitsisai naapertorlugit, 2010-mi innuttaasut 101-iupput. 2020-imilu 66-iullutik.
Nunaqarfimmiut isumaat uani takusiuk:
