Akunnaami tunitsiveqaleqqippoq

Nuka A/S-ip Akunnaami tunisassiorfini ukiup ataatsip missaa qaangiuttoq matummagu imaatigut inuutissarsiorneq unittooraluartoq, maannakkut ilorraap tungaanut ingerlaqqilerpoq.

Pilersuisup ataani Arctic Green Food nunaqarfimmi isumalluarnermik pilersitsisoq oqaatigineqarsinnaavoq. Akunnaarmiut 109 missaanniittut akornanniittut ilaat sulisut arfineq marluk juunip 24-anit nipisat suaannik massakkullu saarullinnik uukkanillu tarajortikkanik suliaqarput.

Aallarteqqaarnerli ajornartorsiuteqarfiusimasoq Arctic Green Food-imi Akunnaami pisortap Abel Olsenip oqaatigaa:

- Aallartikkattali poortuutissat taratsut tarajorterinermut atugassat amigaatigisimavavut, tamatuma kingunerisaanik tunisineq uneqattaartariaqarsimavoq.

Taamaakkaluartoq juunip 24-aniit juulip 20-anut saarulliit 11 tonsit uukkallu 3 tonsit missaat tarajortigassat tunineqarsimapput.

Abel Olsenip tamanna naammaginartippallaanngilaa. Taratsunik amigaatinillu allanik Kangaatsiamiit pissarsinissartik naatsorsuutigaat, taassuma saniatigut Nuummiit nassinneqarsimallutik aamma oqaatigaa. Tunisisartut umiatsiaararsortuunerupput Akunnaarmiut saniatigut Aasianneersunik akoqartarlutik. Aningaasarsioqqissinnaalerneq assut nuannaarutigineqarpoq, Akunnaami KNAPP-p siulittaasua Augustinus Olsen Radioavisimut oqarpoq, tunitsiviup ammaqqinneratigut aningaasarsiornertik ingerlalluaqqilersoq, tamatumalu kingunerisaanik akiligassaminnik akilersuineq ajornannginnerusumik ingerlassinnaalerlugu. Tamatuma saniatigut Ilimanamut tunisiartortarneq pisariaaruttoq assut nuannaarutigaa. Arctic Green Food maannamut qanoq kaaviaartitsisimanersoq Abel Olsenip oqaatigisinnaannginnerarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat