Akulliit 150-iliisinneqarpoq

Ualimut tallimaniit aallartittumik Qasigiannguit eqqaani nunaqarfiusimasoq Akulliit tunngavilerneqarneraniit ukiut 150-t qaangiunnerat pillugu nalliuttorsiortoqarpoq.

Nalliuttorsiornermi peqataasut ilaat qangatut atikkersorsimasut umiamillu Akullernukartoqartoq oqaatigineqarpoq.

Nunaqarfiusimasoq Akulliit 1963-imi inueruppoq, ullumikkulli kingumut uummassusinitsinneqartoq Inuit pinnguaataat pillugit peqatigiiffiup Ajagap siulittaasuata tulliata Lars Johansenip ualimut Qasigiannguaniit aallannginnermini oqaatigaa.

- Akulliit tunngavilerneqarnerminiit ukiut 150-t qaangiupput. Naallu Akulliit juulip qaammataani 1963-imi inuerutereeraluartoq inuisa pingaartippaat, taassuma nunaqarfinnguup qanga iluaqutaasimaqisup nalliuttorsiutigineqarnissaa, Lars Johansen oqarpoq.

Taanna aperaarput, Akulliit inuerutereeraluartoq sooq pingaartinneqarnersoq taamatut nalliuttorsiutigineqarnissaa.

- Inutoqaasa ullumikkut sinneruttut taamatut nalliuttorsiutigineqarnissaa pingaartippaat. Inuit pinnguaataat pillugit peqatigiiffiusugut Ajagaq ( ukioq kingulleq aallartitarput), taavalu anguartit Akullernilu nunaqarsimasut kattulluta aaqqissueqatigiilluta ulloq manna piviusunngortipparput, Lars Johansen oqarpoq. Taanna nassuiaavoq aningaasarpassuarnik tapiiffigineqanngikkaluarlutik ikioqatigiillutik taamatut pilersitsisinnaanertik nuannaarutigigitsik.

Lars Johansen aamma unnersiorpoq inuit pinnguaataat Akullerni pinnguaatigineqassasut taamatuttaaq aqagu sapaammi kalattut arsamik Qasigiannguarmiut Akullermiullu unammissasut.

Lars Johansenip oqarnera naapertorlugu Akulliit 1963-mi inuerutitaavoq Qasigiannguani suliffissuup sulisussaqarnissaa pillugu.

Siunertaavortaaq siunissami Akulliit taamatut nalliuttorsiutigineqartassasoq.