Akulerutsitsiniarneq iliuuseqarfigineqarnerusariaqarpoq

Oqaatsitsinnik ilikkarsimanngitsoq ittuukulutsinneqassanngilaq, ilikkarnissamut iluamik periarfississimanngikkutsigu, taama oqarpoq folketingimi ilaasortaq Lars-Emil Johansen.

Inatsisartut ataatsimiilerpata, Siumuminngaanniit siunnersuutissanut ilaassaaq, inuit nunanit allaneersut nunatsinnut nuunniartillugit piumasaqarnerulernissaq, ilaatigut inuiaqatigiinni akulerutsinneqarnerunissamik inatsimmik ersarinnerusumik pilersitsinikkut. Tamannalu Lars-Emil Johansen-ip ima nassuiarpaa:

- Ittuukulutsinneqartariaqanngillat inuit, oqaatsitsinnik kultooritsinnillu ilinniarnissaminnik periarfissinneqarsimanngikkunik. Lars-Emil Johansen aamma oqarpoq inuiaqatigiinni nutaaliaasuni ammasumillu ingerlatserusuttuni taamatut piumasaqartarneq naliginnaasoq.

- Allamiut nunatsinnut nuukkusuttut periarfissittariaqarpagut qanorlu pineqartarnissaat aammalu qanoq piumaffigineqartarnissaat pillugu ersarinnerusumik aalajangersagaqalernissaq pisariaqarpoq. Tamannalu siunertaralugu, inatsisartuni Siumup gruppiani siunnersuutiginiarparput erserinnerusumik aalajangersagaqalernissaq. Aamma inuiaqatigiit akornanni inatsisartunilu tamani oqallisigineqarnerusariaqarpoq. Nunanit allaneersut inuiaqatigiinnut akulerusimanerulernissaat qanoq anguneqarsinnaanersoq tassani inatsimmi eqqartorneqassaaq. Innuttavinngorusukkaanni, taava aamma piumasaqaatinik ersarinnerusunik peqartariaqarpoq.

Taama oqarpoq, folketingimi Siumut sinnerlugu ilaasortaq Lars-Emil Johansen.