Akuersissuteqaqqaarluni tuttunniartoqarsinnaalissaaq
Akuersissummik peqqaarluni tuttunniartoqarlunilu umimmmanniartoqartalissaaq.
Naalakkersuisut taama aalajangeqqammerput. Ukioq manna ukiunilu tulliuttuni marlunni akuersissuteqarnikkut aatsaat tuttunniartoqarsinnaallunilu umimmanniartoqarsinnaassaaq.
Akuersissutit kommunininngaanniit tunniunneqartarput, maajillu aallaqqaataani akilerneqareersimassallutik. Ukioq manna immikkut ittumik iliortoqarpoq, akuersissutillu maanna piniarneqarsinnaalerlutik.
Tuttunik umimmannillu piniarneq sumiiffinni assigiinngitsuni killilersorneqassaaq, sumiiffiinnilu allani killilersorneqanngitsumik piniarneqarsinnaallutik.
Maniitsup kommuneani umimmaat amerlanerpaaffigisinnaasartik angulermassuk ikilisinneqartariaqartut avatangiisinut pinngortitamullu pisortaqarfik allappoq.
Tuttunniarneq umimmanniarnerlu aggustip aallaqqaataani aallartissapput, Illoqqortoormiuni umimmanniarneq aggustip qulingani aallartissalluni.
