Akuerisaanngitsunik nunaqarfiit ikuallaaveeraqarput
Tamatuma kingunerisaanik ikuallaaveeqqanut CO2-mik aniasitsinermut, nipiliornermut, silamik migutsitinermut kiisalu eqqagassanik immikkoortiterinissamut immikkut piumasaqaateqartoqanngilaq.
-Ikuallaavinnut annerusunut avatagiisinut tunngatillugu akuersissutinik tunniussaqaraangatta, taava piumasaqaateqartarpugut, soorlu Co2-mik qanoq annertutigisumik aniasitsisoqassanersoq, nipilorsinnaaneq pillugu, pujoralatsitsisinnaanermillu immikkut piumasaqaateqartarpugut kiisalu ikuaallaavinni tipiliorsinnaanermut tunngasunik piumasaqaateqartarluta, Tina Kreutzmann Petersen oqarpoq.
Taamatut piumasaqaatinik avatagiisinullu tunngasunik akuersissutinik nunaqarfinni illoqarfinnilu inukinnerusuni eqqagassanut ikuallaaveeqqanut 46-usunut 1990-ikkunni pilersinneqartunut tunniussisoqanngisaannarpoq.
- Ikuallaaveeqqat pilersinneqarnerisa nalaani, sumi tamaani ikuallaasoqartarnerup unitsinneqarnissaa anguniarneqarnikuuvoq. Tassa ikuallaaveqarneq sumi tamaani ikuallaasoqarnermut sanilliullugu pitsaaneruvoq, oqartoqarsinnaavoq ikuallaaveeraqarnikkut CO2-mik aniasitsineq annikinnerulluni. Avatagiisinut aqutsisoqarfimmi immikkoortortami pisortaq Tina Kreutzmann Petersen oqarpoq. Ikuallaaveeqqat 46-t avatagiisinut tunngatillugu akuersissutinik tunineqartussaagaluarput, sulisussaaleqinerli peqqutigalugu tamanna anguneqanngisaannarpoq.
- Illoqarfinni ikuallaavinnut piumasaqaatigisartakkatsinnut angummassinnaanngillat, Tina Kreutzmann Petersen oqarpoq, ikuallaaveeqqallu pilersinneqarnerini piumasaqaatinut angummassinnaanngikkaluartut sumi tamaani ikuallaanermut sanilliullugit pitsaanerusut nassuiaatigalugu.
Ikuallaaveeqqat avatagiisinut tunngatillugu piumasaqaatinut sukannernerusunut akuerineqartussaagaaluarput. Eqqagassat pillugit iliuusissatut pilersaarut 2010-mut 2013-mut atuuttussaq politikkikkut suli akuerineqanngilaq, tassani nunaqarfinni ikuallaavinnut tunngasut allanngortinniarneqarput.
