Aktiaatilik akiliisinnaajunnaartoq siulersuisuniiginnassaaq

Carsten Berger inuttut ajornartorsiutaanngitsoq, piginneqatigiiffimmili aktiaataasa amerlassusaat ajornartorsiutaasoq, NunaMineralsip siulersuisuini siulittaasoq, Anton Christoffersen oqarpoq.

- Carsten Berger inuttut ajornartorsiutaanngilaq, ajornartorsiulli unaavoq, Carsten Bergerip NunaMineralsimi aktiaataasa amerlassusaat, tassami amerlagaatsiaramik, sulimi naluarput kimit kikkunnillu pisiarineqassanersut, Anton Christoffersen oqarpoq.

NunaMineralsip aktiaataasa appariarnerat, Carsten Bergerip suliffeqarfiata akiliisinnaajunnaarnerata kingorna sunnerneqarsimagunartoq, aviisimi ullormut saqqummersartumi Børsenimi, sapaatip akunnerata kingulliup aallartilaarnerani allaaserineqarpoq.

Anton Christoffersen isumaqarpoq nalornineq qaangiutereersimasoq.

- Aktiat akiisa appariarnerinut nalornineq sunniuteqanngitsoorsimanngilaq, maannali nalornineq qaangiussimasoq aamma akit qaffakkiartornissaat neriuutigaarput.

Carsten Berger siulersuisuunerni issiaannassasoq, Anton Christoffersenip erseqqissaatigaa.

- Carsten Berger pikkorilluni siulersuisuni sulilluarsimavoq,sulilluarneratalu malitsiganik NunaMinerals maani Kalaallit Nunaanni piginneqatigiinngorsimasoq ajunngivissoq, Anthon Christoffersen oqarpoq.

Carsten Bergerip inuttut piukkunnaatai aktianik pigisaqartunit qularineqanngitsut, Anton Christoffersenip aamma oqaatigaa.

Siulersuisuni sulinerata tamaanga killeqartariaqarnera aktianik pigisaqartunit piumasarineqarpa?

- Naamik, taama piumasaqartoqanngilaq, kisianni nalunartua unaavoq, aktianik pisisussat qanoq isumaqarneri, Anthon Christoffersen oqarpoq.

Tassalu suli nalorninarallarpoq Carsten Bergerip NunaMineralsimi siunissaa qanoq inerneqassanersoq.

Aktianik pisisussat eqqarsaatigalugit, Anton Christoffersenip neriuutigaa, pisisussat amerlasuut pisiumaartut ataasiinnaq pinnani. Amerlanerusummi pisippata piginneqatigiit arlaatigut aktiaatiminnik tuniniaasariaqalissappata, NunaMineralsimut tamanna ajunnginnerummat.

NunaMineralsip siunissaa pillugu Anton Christoffersen neriulluarpoq.

- NunaMineralsip suliassai pitsaasut eqqarsaatigalugit aamma alliartornera eqqarsaatigalugu eqqoriarsinnaavara pisisussat piukkunnaatillit ilagilerumaarigut, Anton Christoffersen taama oqarpoq.

Carsten Bergerip piginneqataassutai 19,5 procentiupput, 2007-miilli ulloq manna tikillugu aktiat nalingi affaannanngorsimapput.

Carsten Bergerip suliffeqarfiutaa, Rudersdal A/S, apriilimi akiliisinnaajunnaarpoq.