Akoorutissat arnat kinguaassiorsinnaanerannut sunniuteqarnerlussinnaapput
Arnat naartulernissamut periarfissaat ulluinnarni avatangiisitsinniittut amerlaqisut sanngiillisissinnaagaat misissuinerit nutaat takutippaat. Misissuinermi polenimiut, ukrainermiut kalaallillu arnat katillugit 1623-t peqataasimapput.
Allattoq Thora H. Nielsen
marsip 14-at 2014 10:05
Siatsivik teflonimik qalligaq akoorutissartaqarpoq, eqqiaanermi qaqorsaatit, qalipaatit aamma atisanut skuunullu illersuutit seqqittaatit tarnutillu akoorutissartaqartarput. Taakku tamarmik nioqqutissanik sanaartornermi allarpassuarnilu atuisut atortagaannut atorneqartarput.
Arrortikkuminaatsuupput, inunni uumasunilu katersuuttarlutik. Savalimmiuni innuttaasut arferit neqaannik uumasunillu allanik angisuunik nerisaqartarput, kisitsisit takutippaat ajornartorsiut assut annertusoq, Kalaallit Nunaannilu taamaannissaa aamma ilimagineqarpoq.
Akoorutissat pineqartut naviananngitsutut isigineqarsimagaluarput, timimili hormoninut akornusiisinnaasut allatullu aamma akornusiisinnaasut kingornatigut paasineqarsimavoq.
-Arnat taakkunani nunani pingasuni najugallit akoorutissanillu timiminniittoqartut sivisunerusumik aaqartartut paasivarput. Aaqartarneq akoorutissallu imminnut attuumassuteqartarnerat pillugu erseqqivissumik kisitsisitigut paasissutissanik takussutissaqanngikkaluarpoq, aaqartarneralli akoorutissanit sunnerneqarnerusimagaangami nikerarnerulersartoq paasivarput, Julie Lyngsøe Århus Universitetshospitalimi Arbejdsmedicinsk Klinikimi sulisuusoq oqarpoq.
Akoorutissat pineqartut kinguaassiorsinnaanermut akornutaasinnaanersut paasiniarlugu ukiuni kingullerni misissuiffigineqarsimapput, paasissutissalli erseqqissut suli pigineqanngillat, ilimagineqarporli.
- Akoorutissat sunniuteqartarnerat pillugu ilisimasat annikipput, paasisavulli ilapittuutaapput, ilimanarporlu arnat kinguaassiorsinnaanerat akoorutissat taakku pisuullutik sunnertaraa. Tassa imaappoq akoorutissat avatangiisitsinniittut arnat aaqartarnerannut sunniuteqarsinnaammat naartulerniarnerannullu ajoqutaasinnaallutik, Julie Lyngsøe oqarpoq.