Akiuussutissaq Johnson & Johnson-imeersoq Danmarkimi atorniarneqarunnaartoq
Coronamut akiuussutissaq Johnson & Johnsoniminngaaneersoq danskit akiuussusersuinissaanut atorniarneqanngitsoq, peqqinnissamut ministeri Magnus Heunicke Folketingip partiivinut ilisimatitsissutigaa.
Qaqutigoortumik taqqakkut milittoortitsisinnaasutut nalilerneqarmat akiuussutissaq atorunnaarniarneqarpoq.
USA-mi taqqamikkut milittoorsimasut ersiutaasa AstraZenecamik akiuussuserneqarsimasunut assinganik ersiuteqarput.
Danskit akiuussusersuinissaanut akiuussutissaq AstraZenecameersoq aamma atorunnaarneqarpoq.
Marlunnik kapitinnani ataasiaanaq kapitinneq
Taqqakkut milittoornerit pissusissamisut inngillat, tassami napparsimasut aavisa akua nalinginnaanngitsumik issorsaatitaqangaanngillat. Aap akua issorsaataa tassaavoq aak imerpalatikkunnaarlugu aagianngortittarmagu.
Danskit ministeriunerat, Mette Frederiksen, coronamut akiuussutissaq Johnson & Johnson-imeersoq nappaammut covid-19-mut akiuinissaq pillugu februaarip aallartinnerani EU-mut allagaqarpoq.
AAMMA ATUARUK USA-mi Johnson & Johnsonimeersumik akiuussusiisarunnaarallarniartut
Tamanna pissuteqarpoq akiuussutissat allat atorsinnaassappata marloriarluni kapitittoqartartussaammat, Johnson & Johnsonillu akiuussutissaliaanik ataasiaannarluni kapitittoqartassalluni.
Danskit akiuussutissamik taassuminnga amerlasuunik pisereerput, akiuussusertitsinialuusaarnissarlu aarleqqutigineqarluni.
Danskit peqqinnissaqarfiat naapertorlugu akiuussutissamik Johnson & Johnson-imeersumik akiuussuserneqartussat 25-39-nik ukiullit sapaatit akunneri sisamat tikillugit akiuussuserneqarnissaminnut utaqqisariaqarput.