Akiuussutissaq HPV-vaccine 2008-mi akissaqartinneqanngilaq
Inatsisartut peqqinnissaq pillugu ataatsimiititaliaata tamanna innersuussutigigaluarpaa.
2008-mi aningaasanut inatsimmi 2,5 miliuunit koruunit aqqaneq-marlunnik ukiullit akiuussutissamik kapineqarnissaannut atugassanngortinneqarput.
Aqqaneq-marlunniit 16-inut ukiullit qassiunersut takoriarlugit, akiuussutissamillu kapuisoqarnissaanut aningaasartuutigineqartariaqartut qassiuneri paaseriarlugit, Naalakkersuisut 2009-mi pilersaarutigaat inuusuttuaqqat aqqaneq-marlunniit 16-inut ukiullit akiuussutissamik kapineqarsinnaassasut, Peqqinnissaq pillugu ataatsimiititaliami ilaasortaq, Godmand Rasmussen oqarpoq. Danmarkimi niviarsiaraannaat akiuussutissamik kapineqartaraluartut Nunatsinni niviarsiaqqat nukappiaqqallu akiuussutissamik kapineqartassapput.
Akiuussutissaq, HPV-vaccinemik taaneqartartoq, atoqatigiinnikkut tunillaattartumut HPV-virusimut akiuussutissaavoq. HPV-virusi illiakkut kræfteqalissutaasarpoq kinguaassiuutitigullu ajuassutaalertarluni. Soorunami nukappissat illissakkut kræfteqalersinnaanngikkaluarlutik akiuussutissamik kapineqartarnissaat pisariaqarpoq, nukappissat virusimik tunillaassinnaasumik timaanniittoqarsinnaammat.
Peqqinnissamut ataatsimiititaliap naatsorsuutigaa ukiumut arnat tallimaniit arfineq-marluk tungaannut kræfteqalernissaraluinit annaanneqartarnissaat, taamaalillunilu koruunit miliuunit marluk, kræfteqalersimasunik katsorsaanernut atorneqartaraluartut sipaarneqarsinnaassasut.