Juulip ulluisa 22-ianni akiuussusersuisoqarmat, innuttaasut kapitikkiartortunut matut suli ammanngitsut, borgmesteri Charlotte Ludvigsen aappassaa akiuussuserneqarluni kapitippoq.Assi: Christian Sølbeck

Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput

Nunatsinni kommunit annersaani borgmesteri, Charlotte Ludvigsen, atorfilittallu pingasut siulliullutik akiuussuserneqanngikkunik, akiuussusersuinermut ikiuinissartik unitsiinarniarlugu sioorasaaripput.

Nuummi innuttaasorpassuit akiuussusersorneqarnissaanut, soorlu naartusut, milutsitsisut allallu akiuussuserniarlutik akunnialuppassuani utaqqisut akiuussusernissaat namminersorlutik oqartussat akiuussusersuinermut ataqatigiissaarisuata Anna Wangenheimip piareersaruttorneranni, Kommuneqarfik Sermersuumi borgmesterip Charlotte Ludvigsenip (IA) utaqqisut qaangiinnarlugit akiuussusertippoq.

Sisamanngormat akiuussusersuineq paatsiveqanngitsoq

  • Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.

 

  • Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.

 

  • Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.

 

  • Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.

 

  • Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.

Innuttaasorpassuit akiuussuserneqarnissaminnut siuleriiaannissaannut tunngatillugu, qanoq imminnut qanillivallaanngikkaluarlutik utaqqisinnaanerannik, ulloq sioqqullugu Kommuneqarfik Sermersuumi teknikkimut immikkoortortaqarfimmiit ataqatigiissaarinissamut ikiuukkumallutik Anna Wangenheimimut attaveqarput.

Nunarsuaq tamakkerlugu nappaatip tunillaassortup akiornissaanut akiuussusersueruttorneranni akiuussusersuinermut ataqatigiissaarisup ikiuukkusuttut qujarutigingaarpai.

- Piareersaleruttorluta matup tunuatigut kommunimiit atorfilittat iserput, taavalu illikartinneqarpunga oqaluttuuneqarlungalu qanoq pisoqarneranik silataani. Tassa ikiuillutik allartissimallutik. Taavalu noqqaaleriasaarput borgmesteri Charlotte Ludvigseni atofilittallu pingasut siulliullutik kapitinnissamut piumasaqarlutik, Anna Wangenheim KNR-imut oqarpoq.

AAMMA ATUARUK Charlotte Ludvigsen illoqarfiit pingaarnersaanni amerlanerpaanik taaguunneqartoq

- Akunnattoorujussuarpunga, soorunami pissusissamisuunngitsutut isigigakku, allatuulli tunuleriiaattunut ilannguteqqullugit pivakka.  Erniinaannguaq billetsinik tunioraalluta aallartissagatta. Taanna akuerineqanngilaq. Oqarfigineqarpungalu kapiteqqaanngippata ikiuinissartik piaartumik taava unitsiinartariaqarlugu.

Aalajangigassakka marluupput

- Ima paasillugu, inuppassuit silataani utaqqisut, sillimaniarnerlu eqqarsaatigalugu, ullut sioqqullugu ikiuinissaminnut neqerooruteqaraluarnertik atorunnaarsissallugu, sisamaallutik borgmesteri ilanngullugu kapiteqqaanngikkunik. Taannalu ilungersunartorujussuartut tiguara. ajoraluartumillu oqassaanga piffissaq taamatut ingerlareertillugu sukkasuumik qisuariartariaqarsimallunga, Anna Wangenheim oqarpoq.

Nunatsinni akiuussutissamik kapitissimasut

35.000-it siullermeertumik kapitissimapput. Tassa innuttaasut 62 procentii akiuussuserneqareerput.

40 procentit tamakkiisumik akiuussuserneqarsimapput.


38 procentit suli akiuussuserneqanngillat.

Akiuussutissaq Modernameersoq atorneqarneruvoq.

Akiuussutissap aappaa siullermik kapitinnermit ullut 28-t 43-llu ingerlaneranni pissarsiarineqassaaq.

- Aalajangigassarlu uaniisimavoq; siulliutissavakka? Taamaasillunga qulakkiisallugu tunuleriiaattut torersumik aaqqiissorneqarsinnaassallugu, imaluunniit ulloq taanna akiuussusersuineq unitsiinartariaqassavara? Taamaasillunga aamma inuppassuit qassi tiimit sinnerlugit utaqqereersimasut akiuussuserneqarnissaminnut periarfissikkunnaarlugit.

AAMMA ATUARUK Nuummi sisamanngorpat nalunaaqutaq quliniit tallimanut akiuussusersuisoqaqqissasoq

- Taamaammat piffissaq kingulleq atorlugu allatut ajornartumik misigisimavunga akuersaartariaqarlunga, kinguninngua misigisimallunga uukkapaatinneqarsimallunga.  Pissutigalugu pingasunngornermi oqaloqatigigakkit piumasaqaateqartoqarsimanngimmat kikkut siulliullutik kapiteqqaarnissaanut, Anna Wangenheim oqarpoq.

- Ullaap tungaani qulingiluannguinnartoq siuleriiaallutik utaqqilereersut qaangiinnarsinnaammagit iluarinngeqaara.-- Silataanimi naartusut pitsorluttullu kapitinnissaminnut tullinnguunnissaminnut utaqqisut  takusinnaavakka, atorfilittalli pissaanerminnik atornerluillutik qaangiiginnarput, taamaaliornerat nuanneeqaaq, Anna Wangenheim oqarpoq.

Ataqatigiisaarisutut unittoq

Innuttaasut siuleriiaallutik utaqqisut Charlotte Ludvigsenip qaangiinnarlugit iliuuseqarnera Anna Wangenheimip tunngaviusumik isummertarneranut akerlioqimmat akiuussusersuinermut ataqatigiissaarisutut imminut isigiunnaarpoq. Pilersaarut malillugu aggustip naaneranut akiuussusersuinermut pilersaarusiortussaagaluarpoq.

- Akuersaaanngilara inuit nuimanerit imminut iluaqusersussallutik, akiuussusersuinissamut taamatut imminut salliutillutik, inuiaqatigiit tunullugit pissappata, taanna akuerinnginnakku iliuuseqartoqanngimmallu uanga akisussaaffik taanna nammineq tiguara akuerinagu, taamaalilluni killilertariaqarlugu, Anna Wangenheim KNR-imut oqarpoq.

Tassungalu tunngatillugu Charlotte Ludvigsen utoqqatserluni KNR-imut ima oqarpoq:

- Kukkunera utoqqatsissutigaara. Utaqqisut qaangiinnarakkit utoqqatserpunga. Qaangiiginnarnissara takorluunngikkaluarpara, isumaqarlungami akiuussutissat naammattussat.

Taanna Anna Wangenheimimut sianerluni aamma utoqqatserpoq. Tamannali Anna Wangeheimip akiuussusersuinermut ataqatigiissaarisuujunnaarnissaminut aalajangerneranut isumaanik allannguinngilaq.

- Sapaatit akunneranni isornartorsiorujussuarneqarsimagaanni utoqqatsernissamut kingusinaarfioreerpoq. Akisussaaqaataanermik takutsitsinngilaq - akiussusersuinissamullu ataqatigiissaarisuujunnaarniarninnut allannguutanngilaq. Aamma matuma peqqinissaqarfimmi sulisuulluni innuttaasut sioorasaarutaannut qaffasissumillu atorfillit immikkut pineqarniartarnerannut qanoq illersornikitsiginermut una ersiutaaginnarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat