Akiuussusersimanissamut piumasaqaatitaaq: Ajunngilaq
Suli akiuussuserneqarsimanngikkuit bussersinnaanngilatit. Air Greenlandip timmisartuini sinersortaat Sarfaq Ittummiluunniit ilaasinnaanngilatit.
Aqagu marlunngornermi coronamut tunngatillugu killilersuinermi tamakkuupput atuutilertussat.
AAMMA ATUARUK Nuna tamakkerlugu angalassagaanni akiuussuserneqarsimasariaqartoq
Akiuussuserneqarnani pisortat angallassissutaani ilaasimagaanni akiligassinneqarnermik kinguneqarsinnaavoq.
Naalakkersuisut coronamut tunngatillugu killilersuinerannut Nuummi KNR-ip apersugaanit tapersersorneqarpoq.
-Killilersuinerit tunngavissaqarluarput. Ilungersunartumimmi pisoqariasaassagaluarpat ikiuisinnaanissaq killeqarpoq, Nuummi misissuisarfiup eqqaani tulleriiaaqqataasoq, Thomas Petersen KNR-ip oqaloqatigimmagu oqarpoq.
Nammineerluni akiuussuserneqareersimalerpoq, killilersuutilli suli akiuussuserneqarsimanngitsunik eqquingaatsiarnissaa paasivaa.
- Killilersuutit sakkortulaartut oqaatigineqarsinnaavoq, soorlu akiuussuserneqanngitsut angalaqqusaanatillu pisortat angallassissutaani ilaaqqusaanngimmata, Thomas Petersen oqarpoq.
Nunatsinni kapitissimanermut uppernarsaat atuutinneqalernissaa aamma taperserneqarpoq:
- Kapitissimanermut uppernarsaatitaarnissaq isumatusaarneruvoq, ajornannginnerusumimmi angalasinnaalernissamut iluaqutaasinnaammat. Ajornaatsuaqqamik pissarsiarineqarsinnaappat ajussanngeqaaq, Thomas Petersen oqarpoq.
Naleraq Eugeniusip akiuussuserneqarnissamut piumasaqaatinut tunngatillugu ajoriffissaqartinngilaa.
- Uanga ajorinngilara, innersuussutigineqaramimi kapitinnissaq. Toqqissisimaniaraanni nunatta iluani kapitissimasuulluni angalanissaq toqqissisimanarnerujussuunngussaaq.
- Kisianni soorunami sakkortuvoq, ingammik kapitikkusunngittunut. Paasititsiniaaneq annertunerusinnaasoq isumaqarpunga, soorlu makku sammillugit sooq kapitissanersugut, kapuut qanoq imaqarpa, bivirkningii iluaqutissaalu paasissutiineq.
- Akiuussutit qanoq imaqarnerat inuppassuit eqqumaffigigamikkut aamma nalornissutigisarlugu.
Naleraq Eugeniusimut kapitissimanermut uppernarsaat pingaaruteqarpoq.
- Uanga coronapaseqarnerit pingaartittorujussuugaluarpara soorlu nipilersortunik tusarnaartitsinissaq ammarnerunissaat eqqarsaatigigaanni. Massakkut killilersuinerit nipilersortartunut, isiginnaartitsisartunut takutitsisussanut allanullu eqquingaatsiarnikuuvoq inunnik katersuutitsisarmat kisianni aamma nuannartitsisarlutik, taannali maannakuut innarlerneqarami isumaqarpunga coronapaseqarneq allallu atuuttariaqartut arlaatigut.
AAMMA ATUARUK Nuummi tuniluunneq: Tunillaassuuttoqarneranik ersiuteqarpoq
- Kapitittussanut nalornisunut coronapasi atuussinnaappat taanna ajunngittorujussuartutut isigivara.
Tukummeq Hansen akiuussuserneqarsimanermut piumasaqaatinut isumaqataavoq, inuillu ilaat akiuussusertikkusunnginneri aamma paasilluarsinnaavai.
- Uanga isumaqarpunga torraasoq iluaqutaasinnaagami akiuussutissamik kapitilluni. Kisianni aamma soorunami paasisinnaavara inuit ersigisinnaagaat kapitinnissaat iluamik paasitinneqarnikuunnginnamik akiuussusertinnissaq qanoq sunniuteqarsinnaanersoq. Inuit puujortarunaramikkut qanoq iluaqutigineqassanersoq.
- Paasissutissiineq amigaataanikoorujussuuvoq. Nalunngisaqarpunga inunnik kapitikkusunngittunik ersigigamikkut qanoq sunniuteqarnissaat uku akiuussutsit. Soorlu akui, sunniutaa iluaqutaalu.
