Akitsuutit timersortartunuunngitsoq - Uummannami angallannermut

Naalakkersuisut siunnersuutaasa ilagaat timersorluni unammiartortut angalanerini akitsuutit peerneqarnissaat; taakkulu Uummannami eqqaanilu angallannermut taarsiullugit atorneqassasut.

Naalakkersuisuni angallannermut akisussaasuusoq, Jørgen Wæver Johansen, siunnersuuteqartuuvoq.

Angallannermi pilersaarusiaq nalornisoortitseqqavoq. Ukioq manna aningaasaliinermi 8 millioni koruunit atorneqassasut siunniunneqaraluarpoq; maannali siunnersuutaavoq ukiunut marlunnut avillugit atorneqassasut.

Timersortartuinnaat akikillisaaffiginagit, atuartulli paasisassarsiorlutik angalasut, utoqqaallu akikillisaavigineqarniarput. Angalanissat siumut utimullu akigilissavaa 502 koruunit.

Uummannami eqqaanilu angallaffiuleruttornerani angalasut aamma akikillisaaviginiarneqarput. Uummannap eqqaani angallanneq Arctic Umiaq Line-mit siusinnerusukkut ingerlanneqaraluarpoq. Piginnittortaalli taama avannarpasitsigisumut angalasarnianngillat. Naalakkersuisut siunnersuutigaat taavani angalaniat timmisartumik angalasarnissaat.

Uummannami qaatsiartaatip angalalernissaa ajornartorsiutigineqarpoq. Ukiuni tulliuttuni marlunni qaatsiartaatip angalanissanut 2 millioni koruunit immikkoortinneqarput. Qanorli ililluni aaqqiisoqarsinnaanera suli isumaqatigiissutigineqanngilaq.

Kangerlummi ukiuunerani angalaniat aamma puigorneqanngillat. Decemberimiit maajimut sapaatip akunnera allortarlugu qulimiguulimmut ilaanissaminnut periarfissaqalerput.

Kangilinnguit qulimiguulimmik angalaffiunissaat aamma mininneqanngilaq. Aningaasartuutissat aningaasaqarnermut ataatsimiititaliamit sapaatip akunnerata uuma ingerlanerani aalajangiiffigineqassapput.