Akitsuutit isumalluutit erniai pillugit Sulisitsisut Peqatigiiffiat mianersoqqusivoq
Sulisitsisut Peqatigiiffiata pisortaata, Henrik Lethip, erseqqissaatigaa, isumalluutit akitsuuserneqartalernissaannik siunnersuuteqarnikkut Kalaallit Nunaata avammut niuernikkut isertitaqarfigisartagaa eqqugaassasoq. Suliffeqarfiillu kaaviiaartitaqartarnerannik eqquisussamik akitsuusersuineq tunngaviatigut aamma kukkunerunerarpa. - Akitsuusiisoqassappat suliffeqarfiit sinneqartoorutaasigut taamaaliortoqartariaqarpoq, Akileraartarnermut Pisortaqarfimmut akissummini Henrik Leth allappoq.
Aamma tikkuarpaa, akitsuutit qaffanneqassappata inuussutissarsiullu nalorninartoqarnerulerpat kilisaataatileqatigiiffiit ilaasa umiarsuit nunanut allanut tunillugillu suliffeqarfiit matusinnaagaat.- Tamanna suliffissanik nunanullu allanut niuernikkut isertitanik annaasaqarnermik kinguneqassaaq, Henrik Leth ilanngullugu oqarpoq.
Sulisitsisut Peqatigiiffiannit taama oqaaseqarnerit Aningaasaqarnermut Naalakkersuisup, Palle Christiansenip, annilaarutiginngilai. Taanna Sermitsiamut oqarpoq, isumalluutit taakku inuiaqatigiit pigaat. Taamaammat inuiaqatigiit tamarmik pisuussutinik pissarseqataanissaat qularnaarniarlugu akitsuusiisinnaavugut.
- Imaalluarsinnaavoq aalisartut ilaat amigartooruteqartartut, ilutigaluguli aamma takusinnaavarput tunisassiat suliffissuarni suliarineqareeraangamik, immikkoortortaqarfinnilu tuniniaaviusunut ingerlateqqinneqaraangamik, naleqarnerujussuanngorsimasartut. Ataaserlu qularnanngilaq: Iluanaarut taanna Nunatta Karsianut tunneq ajorpoq.
Sermitsiami allassimasoq naapertorlugu akitsuutinik allanngortiterinissap ammasumik oqallisigineqarnissaa Palle Christiansenip aamma kissaatigaa. Isumalluutinilli tamatta pigisatsinnik atuinerup akilersinneqartarnissaa tunngavigalugu aalajangiusimavaa.
