Akitsuutit amerlisarneqarnissaat inassutigineqarpoq

Sulinikkut akissarsianit akileraarutit qaffannissat, ataatsimiititaliap inassutiginngilaa. Sulisoqarniarnermut tamanna ajoqutaassasoq, tunngavilersuipput.

Tassalu Nunatta Karsia isertitassaaleqigaluartoq, akileraarutit qaffatsinneqassanngitsut Ataatsimiititaliamit inatsipput.

Taarsiullugu akitsuutitigut isertitsilluartoqarsinnaavoq. Ataatsimiititaliap tikkuarpaa, akitsuusiisarneq Nunatsinni ullumikkut suli pitsaanerusumik atorneqarsinnaasoq.

Ullumikkut pisiassat ikittuinnaat qaffasissumik akitsuuteqarput, tamatumunnga sukkunut, tupanut, imigassanullu aalakoornatulinnut akitsuutit assersuutissaalluarput.

Nunani allani pisiassat kiffartuussinerillu assigiinngitsorpassuit mikisunnguakkaamik akitsuusersortarpaat, tamannali Nunatsinni naammattumik atorneqanngilaq. maani nunatsinni momsi aamma tuniniaanermi akitsuutit annerusumik atuutinnginnerat ataatsimiititaliamit uparuarneqarpoq.

Nukissiuutinut, CO2-mik aniatitsinermut avatangiisinullu akitsuutit atorneqanngillat, taamaammallu mingutsitsisut saliinissamut atugassanik akiliissanatik.

- Ilorrisimaarniutinut akitsuutit, inuiaqatigiinni pisuussutinik agguaaqqinnissamut atorneqartartut, maani taamaallaat biilinut atuupput, Akileraartarneq Atugarissaarnerlu pillugit ataatsimiititaliap siulittaasua Torben Andersen oqarpoq.