Akitsuutip ajoqutaanissaa qularutigaat
Orsussap akia liiterimut 25 oorimik qaffanneqassappat suliffeqarfiillu ingerlasinnaajunnaassappata, inuussutissarsiornerup ilusilersugaanera qiviarneqaqqittariaqartoq, Sulisitsisut Peqatigiiffianni pisortaq henrik Leth isumaqarpoq.
Akitsuusiinermut siunnersuutip ajoqutaanissaa Sulisitsisut peqatigiiffiata qularutigaa.
- Orsussamik akitsuusiineq nunatta karsiata imaqalaalernissaanut aqqutissatsialaavoq, Henrik Leth oqarpoq.
Palle Christiansenili tuaviorpallaamik aalajangiilluni Akileraarutinut atugarissaarnermullu ataatsimiititaliap oqallissaarutaanit ukiamut saqqummersussamiit tigusiinarnersoq eqqartoqqinneqarsinnaanera Henrik Lethip tikkuarpaa.
- Sulisitsisut Peqatigiiffiata ileqqorinngilaa Naalakkersuisunik Inatsisartunillu pasillissalluni, kisianni imaassinnaavoq uani aaliangiipallattoqartoq, illuatungaatigullu pissutsit imaatsillugit akitsuusiinissaq qanorluunniit avaqqunneqarsinnaanngimmat kukkuluttornertut oqaatigineqarsinnaanngilaq, Henrik Leth oqarpoq.
Orsussamut aki liiterimut 25 oorimik qaffanneqassappat, nunatta karsianut 40 imaluunniit 50 millionit koruuninik isertitsissutaasinnaanera taggippaa.
Sulisitsisulli Peqatigiiffiannit nuannaarutigineqarpoq pisiassanut allanut akitsuusiisoqanngimmat, sorlu ukiualuit matuma siornatigut radiot fjernsynellu akitsuuserneqarnerisa kingunerisimagaat pisiniarfiit arlallit matoorarneqarmata sulisorpaaluillu sooraarsinneqarlutik.
