Assi: Jonas Fievé/KNR

Akitsuutinik qaffaanissaq Naalakkersuisut aalajangiusimavaat

Akitsuutit qaffanneqarnissaannik Naalakkersuisut siunnersuuteqarnertik aalajangiusimavaat.

Nunatta karsiata amigartoorutai matussuserneqassappata tamanna allaqqunneqarsinnaanngilaq.

Aningaasaqarnermut Siunnersuisoqatigiit nalunaarusiaanni saqqummiunneqaqqammersumi aaqqissuusseqinnerit pisariaqartuunerannik oqarneq Aningaasaqarnermut Naalakkersuisup Andreas Uldumip isumaqatigaa.  

- Tassa isumaqatigilluinnarpara massakkut politikeritut takutittariaqalerparput qanorluunniit nuanniitsigigaluaraangata aamma aalajangernerit immaqa mamaagineqassagaluarpata akisussaaffimmik tigusilluta aalajangiisariaqalerpugut, Aningaasaqarnermut Naalakkersuisoq oqarpoq.

Naalakkersuisut akitsuutit qaffanneqarnissaannik siunnersuuteqarnerat ingammik partiinit naalakkersuisuutitaqartunit isumaqatigineqanngilaq. Orsussanut akitsuutit qaffanneqarnissaat innuttaasunit sakkortuumik qisuariarfigineqarput.

Aamma atuaruk GE: Pissaanillit naammanngitsumik iliornerat unittoortitsivoq

Kisianni tassa nunatta karsiata amigaartorutai matussuserneqartariaqarput partiillu allat siunnersuuteqarnissaat tusarusunneqarput:

-  Aningaasat aaneqartariaqarput arlaanninngaanniit, allanik tikkuussisoqarpat partiinit allanit soorunalimi tusarnaassavarput uani suleqatigiissutiginiarsarisussaavarput aningaasanut inatsit, Aningaasaqarnermut Naalakkersuisoq Andreas Uldum oqarpoq.

Aningasaqarnermut siunnersuisoqatigiit nalunaarusiamini tikkuarpaat aaqqissuusseqinnerit kinguartinneqarnissaanut  nunarput akissaqanngitsoq.  

Politikerit maannakkut iliuuseqanngippata nunatta siunissaa nalorninartorsiorfiussasoq, siunnersuisoqatigiit taama oqarnerat aningaasaqarnermut Naalakkersuisup isumaqatigaa.

Isummersuutit


 

Pages