Akitsuutillit tunisat affaannanngorput

Immiaaqqaat, viinnit imigassallu kimittuut akitsuutitaqanngitsut Kalaallit Nunaannut ukiortaamiit eqquteqqusaajunnaarnerat, Pilersuisup Kangerlussuarmi akitsuuteqanngitsunik pisiniarfiani malugineqarsinnaalereerpoq.
Allattoq Jaaku Lyberth
januaarip 27-at 2011 07:35

Aviisi Atuagagdliutit akitsuutitalinnik killilersuilernera allaaserinnippoq.

- Annertuumik eqqugaanerput isertuutissanngilarput.

Kaaviiaartitsinerput ilimageriikkatsitut affaannanngorpoq. Pisiniarfimmik piginnittoq Finn Fabricius oqarpoq, nangillunilu:

- Januaari assut ilungersunarpoq, timmisartukkullu angallannermi aaqqiagiinngittoqarnera oqilisaataanngivilluni, Finn Fabricius oqarpoq.

Kaaviiaartitat affaannanngornerisa kinguneraat pisiniarfimmi kaaviiaartitat 8 millioni koruunit missaaniissangatinneqarnerat, siusinnerusukkut 17 millioni koruuniusarsimallutik.

- Sulisut amerlassusaat naleqqussartariaqarparput, Finn Fabricius oqarpoq.

Akitsuutitaqanngitsunik tuniniaavimmi tamakkiisumik atorfik ataaseq peerneqarpoq, taamaalilluni tamakkiisumik atorfiit ullumikkut 3,5-iulersut, Finn Fabricius ilisimatitsivoq.

Pilersuisoq Kangerlussuarmi aamma tammajuitsoorniarfeqarpoq nerisassaarniarfiuteqarlunilu, tassanilu aamma tamakkiisumik atorfiit pingasunik ilanngarneqarput.

- Nammineerlunili soraartarnerit qujanartumik atorpavut, taamaalilluta soraarsitsinissaq pinngitsoortillugu, Finn Fabricius oqarpoq.

Akitsuutitaqanngitsunik pisiniarneq aallalernermi suli atuuppoq. Finn Fabriciusip oqarnera naapertorlugu akitsuutitaqanngitsunik tuniniaanerup affaannanngornissaata Pilersuisumit ilimagineqarnerata peqqutigigaa, qangalili akitsuutitaqanngitsunik tunisat affai nunamit aallalernermi pisiarineqartarsimammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq