Puisit amiisa tuniniarneqartarnerat akerlilersorneqartaraluaqisoq, sapaatip-akunnerata naanerani Ontario-mi kaattaassisoqarnerani pisisartut puisit amerserusussimaqaat.
Oqaluttuarineqarpoq puisit amii 6000-t akitsorterussisoqarnerani tunineqarsimasut puisip amianut ataatsimut agguaqatigiissillugu 338 koruunimik akiliisoqartarluni, pisisullugooq amerlanerit Danmarkimeersuupput Canadameersuullutillu taama nutaarsiassaqartitsivik CBC News nalunaarpoq.
Puisit amii 1800-t akitsorterussinermut anngutinngitsoorsimapput, taakkuligooq Nunavummi mersortartunit atorneqassajunnarsipput.
Septembarip qaammataani EU-miit siunnersuutigineqarpoq puisit amii Canadameersut nunanut EU-mut ilaasortaasunut eqquteqqusaajunnaarsinneqartariaqartut. Siunnersuut taanna siunnersuutigineqarpoq, Canadamiut puisinniariaasiat assut ajoralugu oqallisigineqalernerata kingunerisaanik.
Taamatut isorinnittorujussuanngorneq puisit amiinik niuertunut ernummatigineqaqaaq, puisimmi amiisa tunisaanerisa ajoquserneqarnissaat ernummatigineqaqigami.
Puisilli amiisa tunisaanerat ajorpallaarsimanngimmat akitsorterussinermi iluanaarutaangaatsiarsimapput.