Akitsinnguaq: Paasissutissat isertuussat IA-mit piumasarineqaraluarput

Inuit Ataqatigiinni gruppip piumasarisimavaa 2010-mut aningaasanut inatsisissatut siunnersuummut atatillugu paasissutissat isertuussat tunniutissagai, tamannalu tunuarnerminut pissutaasutut pingaarnerpaatut Akitsinnguaq Olsenip Sermitsiamut oqaatigaa.
oktobarip 16-at 2009 10:27

Aaqqiagiinnginneq pilerpoq ukiakkut ataatsimiinnissaq sioqqullugu aningaasanut ataatsimiititaliap Ilulissani isumasioqatigiinnerani.

- Aningaasanut ataatsimiititaliami sulineq suli naammassinngitsoq piumasarineqarsimavoq paasissutissat isertuussat Inuit Ataqatigiit gruppianut tunniutissagikka, aningaasaqarnermut ataatsimiitaliami siulittaasuusimasoq, Akitsinnguaq Olsen, oqarpoq.

Inuit Ataqatigiit gruppianni siulittaasup, Olga Poulsen Berthelsenip, Akitsinnguaq Olsenip oqaasii ilumuunnginnerarpai.

- Ilisarisinnaanngilluinnarpakka. Paasissutissanik isertuussanik apeqquteqartoqarsimaneranut ilisimasaqanngilanga, Olga P. Berthelsen Sermitsiap nittartagaani issuarneqarpoq.

Akitsinnguaq Olsen, Siumumut ilaasortanngornissani sioqqullugu Demokraatinut ilaasortanngorumasimagaluartoq, Sermitsiami allaaserineqarpoq.