Akit tulleriiaallutik qaffassapput
Akit tulleriiaallutik qaffakkiartorput. Assartuussinermi akit siulliullutik qaffariaramik, taava ikummatissat akii qaffakkamik aamma innaallagissap akia 11 procentimik ippassaq qaffappoq.
Taava allat tamarmik tullinnguullutik akitsussapput: Nerisassat, atisat ilami ulluinnarni pisariaqartitat tamarmik akitsussapput. Sanaartornermik akit qaffassapput allarpassuillu ilanngullutik. Aningaasarsiallu imaaliallaannaq qaffanngitsutuaassapput.
Soorlu Kalaallit Nunaanni Brugsenit pisortaat, Olav Thomsen, oqarpoq.
- Matuma kingunerissavaa, akigitavut iluarsisariaqalissagatsigit. Tassami nalunanngilaq, aningaasartuutit angisuujupput, tassalu allamik periarfissaqannginnatta, akit iluarsisariaqarpavut, Olav Thomsen oqarpoq.
Tassalu allatut oqaatigalugu, akit qaffannerat, atuisartut akilissavaat. Assartuussinermi akit innaallagissallu akiata qaffarujussuarneranut Brugsenit annaasaqarnermikkut allaniit taarsiiffiginneqarnisamut periarfissaqanngillat.
Pilersuisumiit aamma taama oqarput. Aningaasaqarnermut pisortaq, Lars Møller-Sørensen, ima oqarpoq:
- Isumaqarpunga paasiuminartupilussuusoq. Uulia ingammillu innaallagiaq akitsormat, soorunami pisiniarfiutitta ingerlannissaat akisunerulerpoq. Immikkullu oqaatigineqarsinnaavoq, nillataartitsiviit qerititsiviillu, innaallagissamik pisariaqartitseqisut, ingerlatissallugit akisoqisut, Pilersuisumi aningaasaqarnermut pisortaq, Lars Møller-Sørensen, oqarpoq.
Qaqugu qaffassanersut oqaatigisinnaanngilaat
Innaallagissamut, uuliamut assartuinermullu akit qaffanneri pisiassat akiinut qaqugu malunniutissanersut erseqqissumik oqaatigisinnaanngilaa. Kisianni tassa qaffassapput.
- Ullumimiit aqagumut akitsuinavianngilagut. Qaffakkiartuaassapput, akinut iluarsiisarnitsinnut iluatsinneqartassallutik, Pilersuisumiit oqarput.
Brugseniniit Olav Thomsen aamma taamatut nipeqarpoq oqarluni, akinik qaffaanisartik tunuarsimaaruttuaannaritsik. Kisianni unammillertitik qanoq akilersuisitsinersut nakkutigeqqinnaartarnerarpaat:
- Innaallagissamut siorna 10 mio. kr.-nik aningaasartuuteqarpugut, akialu 10 %-imik qaffappat, aningasartuutivut 1 mio. Kr.-inik qaffassapput, Olav Thomsen oqarpoq.
Taavalu apeqqutaalerpoq, Brugsenimi ilaasortat 30.000-it missaanniittut iluarusuutigisartakkamikkut, tassalu agguagarsiassamikkut aamma misillertitaassanersut?
- Naamik. Agguagarsiassat taamaaginaarnissaat aalajangiusimassavarput. Nulugut sukattariaqarpavut, allatigullu aaqqiilluta, Brugsenit pisortaat Olav Thomsen oqarpoq.
Akit qaffannerisa aningaasaqarnikkut sunniutaat akit qaffakkiartornerisa januaarimi naatsorsorneqarneranni takuneqarsinnaalissaaq. Akit qaffakkiartornerisa naatsorsorneqarnerit februaarimi saqqummiunneqarnissaat ilimagineqarpoq. Tassalu aamma aningaasarsiat pillugit isumaqatigiissutit ilaanni malunniuttartumik, akit qaffakkiartornerannut iluarsiissuteqarnissaq ilimagineqarsinnaavoq. Akit qaffakkiartornerannut iluarsiissuteqartarneq assersuutigalugu aamma sanaartornermi akigitigitani malunnaateqarluartarput.
