Akit qaffasinnerujussuat imminut pilersunnginnermik pissuteqarpoq

-Uagut nunatsinni immitsinnut pilersornerput killeqarmat, taava avataaninngaanniit pisiortornerujussuaq tunngavigalugu ulluinnarni inuuniartarpugut. Taamaattumik nunani allani akit qaffakkaangata uagut eqqorneqarnerput naliginnaasumik nammineq immineq pilersorsinnaassuseqartunit qaffasinnerusarluni, Aningaasaqarnermut naalakkersuisoq Per Berthelsen oqarpoq. Aamma oqarpoq, akileraarutit qaffakkiartornissaat pakkersimaarniarlugu, sukkunut/sioraasanut, tupanut imigassanullu akitsuutit qaffanneqarnikuusut.

Nunarsuarmi aningaasaqarnikkut ajornartoornerup kinguneranik akit qaffannerat pillugu Aningaasaqarnermut naalakkersuisoq Per Berthelsen ima oqarpoq:

-Kalaaleqatikka kaammattorumavakka uippalleqqunagit. Naatsorsuutigilluinnarpara una ataasiartaasoq taama annertutigisumik akit qaffaateqarnerat; tassarpiaq nunarsuaq tamakkerlugu aningaasaqarniarnikkut ajalusoornermik tunngaveqarmat. Naatsorsuutigilluinnarparput piffissami qanittumi ungasinngitsumi akit naliginnaasumut inissikkiartoqqilissasut, malunnarsereermammi nunani, ulluinnarni soorlu atugassanik aamma pilersuinermik suliaqartuusut iluanni maanna akit appariartulereersut, taakkuali qaammatialunnguit qaangiuppata nunatsinni sunniuteqarnissaat naatsorsuutigissavarput,

Aningaasaqarnermut naalakkersuisoq Per Berthelsen taama oqarpoq.