Akit qaffanneqarneri kommunimit ugguanneqarpoq
Taama kommuni nalunaarpoq meeqqanik inuusuttuaqqanillu ulloq unnuarlu paaqqinnittarfinniisitsisarnissamut, 4,3 millioner koruununik immikkut ittumik tallimanngormat aningaasaleereerlutillu.
Ulloq unnuarlu paaqqinnittarfinniisitsisarnermut akit, Namminersorlutik Oqartussat KANUKOKA-llu akornanni isumaqatigiinniaassutigineqareersullu qaffanneqarput.
- Akit ataatsimut isigalugit 10,5 procentimik qaffanneqarput. Taamaattoq Oqartussanit KANUKOKA-millu oqaatigineqarluni qaffaaneq annikittuaraasoq, Kommuneqarfik Sermersooq allappoq.
Aamma atuaruk Sermersooq: Ulloq unnuarlu paaqqinnittarfiit akisuallaarput
Akit maanna tamaa annertutigisumik qaffanneqarnissaat, kommunip aappaagumut aningaasartuutissaasa suliarineqarlutik akuersissutigineqarneranni, qaammatit marluk matuma siorna pisumi, ilisimaneqarsimanngitsut Meeqqanut, Ilaqutariinnut Atuarfinnullu tunngasunut kommunip ataatsimiititaliaata siulittaasuata tulliata, Uju Petersenip oqaatigaa.
- Paaqqinnittarfinnut akigitinneqartussat ukiup taamaalinerani nalunaarutigineqarneri naammaginanngilaq, Uju Petersen, Inuit Ataqatigiit sinnerlugit kommunalbestyrelsemut ilaasortaasoq oqarpoq.
Aamma atuaruk Meeqqanut inuusuttuaqqallu inissinneqartunut aningaarsartuuterpassuit
Namminersorlutik Oqartussat ulloq unnuarlu paaqqinnittarfiiniisitsisarnermut akit qaffannerannut pissutaasoq tassaavoq taakkununnga piumasaqaatit annertusineri, KANUKOKA-p pisortaa, Hans-Peder Barlach Christensen oqarpoq.
- Paaqqinnittarfinniisitsiarnermut akit aalajangersimasuussapput kommunillu immikkut ittumik meeqqanik inuusuttuaqqanillu susassaqartitsinerinut immikkut aningaasartuutaasunut Oqartussat akiligassanik nassiussisassanngillat, KANUKOKA-p pisortaa oqarpoq.
Kommuneqarfik Sermersuumit nalunaarutigineqarpoq, aappaagumut aningaasartuutissat qujanartumik sinneqartoorutissaqarmata, immikkut qaffaanermut akiliutigineqartussat karsimiit tiguneqarsinnaassasut.