Akit assigiikkunnarnerat Inatsisartuni ippassaq oqallisaangaatsiarpoq
Innaallagissap kiassarnerup erngullu akiisa assigiikkunnaarsinneqarnerisa kingorna nunaqarfinni isorliunerusunilu najugaqartut inuuniarnermikkut atugarisaat naliliivigineqaqqannissaat Siumut sinnerlugu inatsisartuni ilaasortap Ruth Heilmann-ip oqallisissiaa Inatsisartuni ippassaq oqallititsingaatsiarpoq.
Ruth Heilmann oqarpoq nunaqarfinni angalaartarnermini nunaqarfimmiut inuuniarnermikkut artorsarnerulernerat paasisimagini:
- Nunaqarfinni isorliunerusunilu annermik inuuniarnikkut eqquivoq, pingaartumik innaallagiaq imerlu akitsornikuupput, taassumalu kingunerisaanik pingitsoorani inuuniarneq allanngorpoq, naak oqartoqaraluartoq uuliap akitsornera peqqutaaqataagaluartoq, aamma ulluinnarni pisariaqartitat inuussutissat akitsormata, Ruth Heillmann oqarpoq.
Aningaasaqarnermut Naalakkersuisoq Josef Motzfeldt aperaarput Assigiimmik akeqartitsinerup atorunnaarsinneqarneranik aalajangerneq sattaaserluni aalajangiinerusimanersoq, akivoq:
- Naamerluinnaq, nunatta oqaluttuarisaanerani Namminersornerulernittalu kingorna inuiaqatigiinni allannguinerni aatsaat taama allanngiunerit annertuut piareersarluagaatigisoq eqqunneqarpoq. Nunatta annerpaartaani innuttaasut ornillugit isumap siunnerfianik saqqummiuviuvoq inuiaqatigiillu isumaannik oqalliffiulluni, Josef Motzfeldt oqarpoq.
Josef Motzfeldt oqarpoq Naalakkersuisut siuarsaanermi suliffissaqartitsinikkut, illussaqartitsinikkut, ilinniartitaanikkullu ingerlatsinermikkut aningaasalersueriaatsit assigiilluinnartumik ingerlakkaat.
- Nunaqarfinni isorliunerusunilu illoqarniarnikkut allaat illoqarfinninngaanniit pitsaanerulernikuupput, taamaanmmaat akit 10 procentimik akit qaffattarnerat akit assigiikkunnaanerannik patsiseqartoq kisimi pissutaanngilaq inuit nutserusunnerannik oqalunneq, tassami ilisimaneqartariaqarpoq 2005-i siuoqqullugu ukiumut inuit 10.000-kkaat nuatserarnerat ingerlajuarsimavoq, tassalu akit assigiittussaanerannik toqqammaveqarnersoq imalunniit allanik inuuussutissarsiutitigut suliffissanillu ujartuineq, imaluunniit meeqqat periarfissagissaarnerulernissaannik ujartiunermik toqqammaveqarnersoq, tassa tamakkuupput ukiap tungaanut paasissutissanik katersuiffissavut, Josef Motzfeldt oqarpoq.
Siumut isumaqarput akit assigiikkunnaarnerat nunatsinni aningaasarsiornerup siuariarneranut periarfissagissaartitsinerulersoq; equngassutaasunilli aaqqiinissaq siunertaralugu aningaasaateqarfiliortoqarnissaa siunnersuutigaat.
