Akit assigiikkunnaarnissaat akuersissutigineqassagunarpoq

Aappaagumut aningaasanut inatsisissaq aappassaaneerlugu ullumi inatsisartuni oqaluuserineqartussaavoq, tassungalu atatillugu innaallagissamut imermut kiassarnermullu akit assigiikunnaarnssaat eqqartorneqassalluni.

 Akit assigiikunnaarnissaanut amerlanerussuteqarluartut isumaqataapput, Siumut IA Demokraatillu akuersissallutik nalunaarutigereerlugu. Akit assigiikunaarpata tunisassiornermi ilaatigut iluaqutaasasoq ilimagineqarluni.

 Atassut akerliulluni taasissamaarpoq, partii isumaqarmat paasiniagassat suli arlaqaqisut, allannguutillu ukiumik ataatsimik kinguartineqassasut atassut isumaqarpoq.

 Akit assigiikunnaarnissaat inatsisartuni aappassaaneerneqannginnerani aningaasaqarnermut ataatsimiitsitaliami eqqartorneqareerpoq, partiillu isumqatigiiput paasiniagassat amerlassasut.

 Taammaammat Siumut IA Demokraatillu siunnersuuteqarput ukioq 2006-mi ukiakkut inatsisartut ataatsimiineranni suliaq sukumiisumik nalilersorneqaqqissasoq, pingaartumik aningaasarsiakitsunut sunniutit eqqarsaatigalugit.