Akit appasinnerusut - aamma kikkut tamarmik nerisassaqarlik!

Tamatumuuna akerliussutsimik takutitsinermut patsisaasoq tassaavoq, misissuinerup nutaap paasinarsisimmagu, meeqqat 15-it inorlugit ukiullit 56 procentii naammattumik nerineq ajortut aamma Nunavummi ilaqutariit pingajorarterutaasa sinnillit ullut tamaasa naammattunik nerisassaqarnissartik qulakkeerneq ajoraat.

Leesee Papatsie Iqalunneersoq Nunatsiaq News-imut oqarpoq, ilinniagaqarsimanerup naammattunillu nerisassaqarnissap qulakkeernissaa imminnut ataqatigiilluinnartuusut. Ilaqutariinni ilinniakkaminnik naammassinnissimanngitsuni, nerisassanik amigaateqarneq ilaqutariinnut allanut naleqqiullugu marloriaataasarpoq.

Leesee Papatsie aamma taanna tassaavoq, Facebookimi quppernermik siorna pilersitsisoq taallugu "Ilaquttakka nerisassanik naammattunik tunikkit". Facebookimi qupperneq taanna 20.000-it sinneqartunit maanna malinnaaffigineqarpoq, ilaatigullu Nunavummi nerisassat akisunerujussui tassani ilisimatitsissutigineqartarlutik.

Iqalunni nerisassaarniarfiit silataanni aamma Nunavummi illoqarfinni nunaqarfinnilu allani aggustip 15-ianni akerliussutsimik takutitsinissamut aggersaasoqarpoq. Oqaasinnaarineqartussallu tassaallutik. Akit appasinnerusut - aamma kikkut tamarmik nerisassaqarlik!