Akisussaatitsisoqartariaqarpoq

Great Greenlandip puisit amiinik Canadameersunik pisisarsimanera pillugu Inatsisartut Aningaasaqarnermut Ataatsimiititaliaat ippassaq immikkut ittumik ataatsimiinnermini naliliivoq pisoq ilungersunartoq pinngitsoorani kinguneqartinneqartariaqartoq, Great Greenlandip pisortaata Michael Nielsen-ip eqqunngitsumik paasissutissiisimanissaa ilimatsaanneqarmat. Inatsisartut Aningaasaqarnermut Ataatsimiititaliaani siulittaasoq Ellen Christoffersen Atassut oqarpoq:

- Nunatta avataaniit isigineqarnera minnerunngitsumillu niueqatigiinnikkut avammullu amminik tunisassiorneranut innarliisoqaratarsinnaanera pillugu pingaartipparput piaartumik iliuuseqarnissaq.

Aningaasaqarnermut Ataatsimiititaliaq piumasaqarpoq pisoq kinguneqartinneqartariaqartoq piumasaqarnermut tunngavik pillugu Ellen Christoffersen oqarpoq:

- Taamatut iliortoqarsimanera kinguneqartariaqarpoq. Maannakkorpiaq soorunami toqqaannartumik oqarsinnaanngilagut soraarsitsisoqassanersoq, pingaaneruteqarluinnarporli nunatta ukiorpassuarni puisit amiinik tunisassiorneranik ilorraap tungaanut saatsitsiniarluni ingerlatitsisoqarneranut ajoqutaasinnaasumik iliuuseqarsimanermut akisussaasuusunut kinguneqartitsisoqarnissaa.

Great Greenlandimi pisortaq Michael Nielsen oqarpoq puisit amii Canadamit pisiatik piniarfimmit The Frontimeersuusut Sankt Lawrencemeersuunatillu, Sank Lawrencep kangerliumarngani avaartaaginnarluni puisinniartoqartarmat.

-Aningaasaqarnermut Ataatsimiititaliap qinersineq sioqqullugu paapilissat tigusimavai, Aalisarnermut Piniarnermullu Pisortaqarfimmit ilisimatitsissutit, puisit amiinut tapinut tunngasut. Taakkunani Great Greenlandip pisortaa Michael Nielsen oqarpoq puisit amii pisiarisartakkatik Sankt Lawrencep kangerliumarngani puisinit pisarineqartartuneersuusut. Michael Nielsen tusagassiuutini maannakkut oqarpoq taakku The Frontimi pisarineqartut amerigaat. Taamaattumik arlaatigut kukkusumik paasissutissanik tunineqarsimavugut, naluara tusagassiortunut kukkusumik paasissutissiisoqarsimanersoq imaluunniit Pisortaqarfimmut kukkusumik paasissutissiisoqarsimanersoq. Taakkua naapertuutinngitsut Naalakkersuisunut erseqqissumik paasiniarpavut, sunaana eqqortoq aallaaviginiaripput? Ellen Christoffersen aperaaq.

Naalakkersuisut ippassaq aalajangerput puisit amiinik Canadameersunik pisisarneq unitsinneqassasoq. Great Greenlandip pisortaa Michael Nielsen pisumut oqaaseqarumanngilaq taavalu Piniarnermut Aalisarnermullu naalakkersuisoq Finn Karlsen Atassut oqaaseqartissinnaasimanngilarput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat